Cun novs products egl avegnir

Da Hans Huonder / anr

Avon pressapauc quater onns ei l’Uniun la caura en Val Medel vegnida fundada. Sia finamira ei da promover ils products dalla caura ed il medem mument la tratga da quellas. In ulteriur pass en direcziun da quella finamira ei la fundaziun dalla Cascharia Muraun SA stada. Avon dus onns ha quella entschiet cun sia producziun a Curaglia/Fadretsch. Dapresent lavura la caschadra Brigitte Holz vid differents recepts novs. Cun la modernisaziun dall’alp da cauras Puzzetta sur Fuorns avon ina partida onns han ins vuliu tschentar in accent en favur dalla tratga da cauras. Igl ei denton semussau bein spert che quei project persuls ei buca persistents. Per che la tratga da cauras seigi en ina fuorma ni l’autra silmeins parzialmein lucrativa ston ils products da quellas saver vegnir commercialisai igl entir onn ora. Persuenter drova ei ina cadeina da survetschs. Cun la finamira da serrar quella cadeina ei l’Unin la caura vegnida fundada. Grazia als contacts da vischinas e vischins da Medel ella Bassa ha quella uniun cattau beinspert in bien resun ed aschia in tschuppel simpatisantas e simpatisants. Sco quei ch’il president dall’uniun, Peter Binz, di dumbra l’uniun oz gia 140 commembras e commembers. Per la contribuziun annuala da 300 francs retscheivan quels mintg’onn per 150 francs products da caura ord la Val Medel, ultra da quei ein els envidai ad in gentar che vegn purschius alla radunonza generala. Cumpletau quella purschida ha allura la Cascharia Muraun SA che producescha dapi il schaner 2017 specialitads ord il latg caura. Il baghetg sesanfla a Fadretsch sut Curaglia. La societad acziunara vegn medemamein dirigida da Peter Binz.

Menaschi sur onn

Ton l’uniun – che vegn dil reminent sustenida d’ina fundaziun cul medem num ed intent da promover la caura sisum la Surselva – sco la cascharia, muossan ch’il potenzial da products da caura ei avon maun. Denton era cheu semuossa ei ch’ei drova repetidamein novaziuns. La bilanza che Binz tila da quei temps ei positiva: «Nus havein fatg biaras bunas experientschas, vesin denton era ch’il svilup d’ina tala purschida drova siu temps.» Dapi igl october 2017 ei Brigitte Holz, oriunda dalla Germania, caschadra. Ell’ei engaschada en ina plazza cumpleina, pliras persunas occupan in’ulteriura mesa plazza da lavur cun differents pensums parzials. «Jeu haiel viu spert ch’il success d’in tal menaschi ei pusseivels mo cun ina producziun sur onn. Pertuccont la caura ei quei denton buc aschi sempel cun risguard dalla lactaziun», di l’inschigniera agrara diplomada. Il client vegli oz products sur onn e buca mo duront in temps: «En sesez ei quei gie encunter la natira, mo sch’ins vul promover la caura ed haver success persistent cun ses products tonscha ei buca da disponer d’in menaschi stagiunal.» Per quei motiv ha la Cascharia Muraun SA entschiet ad elavurar latg caura sur onn, vul dir era la stad. Questa stad ei quei stau pusseivel grazia a purs – denter auter d’ordeier la Val – ch’han buca cargau lur cauras ad alp. Aschia san stizuns, menaschis da gastronomia sco era clients privats ella regiun ed ella Bassa vegnir survi regularmein cun products frestgs. Il mument elavura la Cascharia Muraun rodund 750 kg latg per jamna.

Ei drova era novs products

Sper ils products ch’ein gia en vendita tier la Cascharia Muraun SA sco caschiel caura miez dir, caschiel mischedau cun latg caura e vacca ni era caschiel frestg e tschagrun lavura Holz il mument vid novs recepts: «Grazia alla grondezia da nossa cascharia e nos indrezs ei quei bein pusseivel. Denter auter lavurel jeu ussa vid in caschiel lom.» Ella experimenteschi fetg bugen, quei seigi sia pissiun. «La finamira ei secapescha da saver producir in mument entginas specialitads novas», di la caschadra ch’ha luvrau rodund 30 onns a Stuttgart el svilup da products da latg. In ulteriur factur che gioga il mument era in’impurtonta rolla el menaschi dalla cascharia ei la distribuziun dils products. «La cascharia sezza ei ina caussa, l’autra ei la vendita. Nus lessen empruar d’optimar e d’augmentar nossa producziun e distribuziun», di Binz. In augment vegness secapescha dabien al menaschi sez, mo lu era als purs: «Tut quei va maun en maun.» La finamira seigi veramein da saver producir sur onn. La promtadad d’entgins purs da collaborar seigi avon maun. «Ils resuns che nus havein da nos commembers e clients era ella Bassa ein fetg empermettents e la reit s’engrondescha incuntin. Fetg grev eis ei naturalmein da vegnir sut tetg tier in detaglist grond», di Holz.