Igl directer turna betg – dus donnas ad interim

(pb) Scu tgi igl Center da Sanadad Savognin communitgescha sa reteira Gion Cola, igl directer dalla tgesa, an cunvegnientscha vicendevla digl sies post. Scu gio igl davos taimp vign igl center da sanadad mano ad intermin da Christine Demarmels e Sandra Luzio. All’antschatta otgover vignan publitgeidas ainten las gasettas digl de grischunas brevs da lectours tgi expriman critica anvers la direcziun digl Center da Sanadad Savognin. Chella critica sa drezza anvers la direcziun scu er anvers igl cunsegl d’administraziun. I sa tracta da problems da persunal tgi vignan pero betg differenztgias cleramaintg.

Igl muteiv principal para dad esser la retratga dalla medica Natascha Uffer tgi luvrava an en pladimaint da 20%. Tar ena nova relaziun da pladimaint ins ò betg savia sa cunvagneir e la medica è sa retratga.

Campagna dallas medias

Allas brevs da lectour è suandada ena campagna dallas medias, spezialmaintg dad RTR, cun attatgas dètg fermas anvers igl directer Gion Cola. Per sottastritgier la critica ins ò laschea neir a pled en anteriour medic assistent tgi veva luvro en mez onn agl spital a Savognin e siva rot giu igl sies taimp d’assistenza perveia da muteivs persunals. Da vart dalla direcziun digl center da sanadad ins ò betg replitgia allas ranfatschas sa basond sen la cunvegna da secretezza.

Igls 7 da november ò igl cunsegl d’administraziun digl Center da Sanadad Savognin SA anvido la populaziun ad ena seira d’infurmaziun. Igl directer Gion Cola n’è betg preschaint. Igl president digl cunsegl d’administraziun communitgescha tgi el seia scretg malsang. Alla seira d’infurmaziun eran er anvidos igls autours dallas brevs da lectours.

Da vart digls responsabels ins ò concedia tscherts sbagls capitos agl passo e musso la voluntad da leir migliurar diversas tgossas. Gl’è pero er nia fatg attent tgi igl center da sanadad seia en’interpresa tgi vegia da neir manada tenor prancepis economics e vegia a media ed a lunga vista da preschentar en chint equilibro.

Chegl tgi era betg sto igl cass igls davos dus onns e per contanscher chegl seian da basigns maseiras da spargn. Er tar igl persunal. Er tar igl persunal da cader.

Ainten la discussiun generala èn er neidas ulteriouras ranfatschas anvers la direcziun, ma sainza tgi chellas fissan stadas fitg concretas. Gl’è er nia pretendia tgi igl directer Gion Cola duess neir ramplazzo. Da vart digl publicum dalla seira d’infurmaziun è er nia bler lod per la tgesa e per igls sarvetschs da chella. Da chegl è sa resulto tgi igls problems actuals na seian betg dalla vart medicinala, mabagn dalla vart persunala.

Igl directer turna betg

Igls 20 da december 2018 vign la communicaziun digl Center da Sanadad Savognin tgi an cunvagnientscha vicendevla, anfignen ossa anc adegna scretg malsang, turna Cola betg ple. Ni scu directer ni ainten en’otra funcziun.

Igl travagl vign mano ossa anavant scu igls davos meis d’ena vart da Christine Demarmels tgi è pladeida siva digl 2005 e lavoura oz scu manadra dalla contabilitad e controlling ed fò part siva digl 1. settember da chest onn scu nova commembra dalla direcziun. Represchentond ainten chella principalmaintg igl persunal. Da l’otra vart da Sandra Luzio tgi lavoura gio siva digl 1995 tar igl spital acut aint igl center da sanadad ed è lò manadra digl persunal e scu tala er commembra dalla direcziun.

Scu tgi Clemens Poltera ò detg anvers la Pagina vigna ossa igl center mano ad interim da chellas dus persungas. Ainten l’amprema seduta digl onn vigna igl cunsegl d’administraziun a s’occupar er dalla dumonda dalla successiun. Sen la dumonda, schi la situaziun actuala fiss er en’opziun per venavant, manegia Poltera: «Chegl fiss ena pussebladad, per-tge igl davos taimp ègl funcziuno fitg bagn cun igl travagl. Ma scu detg, nous nign a discorrer la tgossa aint igl onn nov.»

Gion Cola (55) ò en taimp da disdetga da seis meis, damais tgi el ò anc en po taimp da tschartger en nov angaschamaint. Chegl tgi el vot er far.