Il hotel amiez Surcuolm

(anr/abc) Dacuort han ils ustiers novs, Bea Castelli e Frank Mossmann, envidau la populaziun ad in aperitiv d’avertura. Il hotel ed ustria Surselva a Surcuolm han entschiet ina nova epoca. La casa dils onns siatonta haveva da basegns d’ina renovaziun. Quella ei ussa finida ed il menaschi aviarts. Suenter divers onns cun ina fasa transitoria senza clar concept pari ch’il hotel Surselva a Surcuolm sappi cuntinuar cun sia intenziun: Retscheiver hosps, porscher a quels bialas uras en in liug ruasseivel, survir bunas tratgas en in ambient amicabel. En connex cull’avertura dil territori da skis dil Péz Mundaun all’entschatta dils onns siatonta ei il vitget da Surcuolm sedestadaus. Il fatg ch’ei existeva mo ina infrastructura gastronomica minimala ha motivau divers investurs da vegnir activs.

Novas structuras

Aschia ha ina gruppa da diesch umens da fatschenta dils cantuns Turitg e Schaffusa baghegiau igl onn 1975 il hotel Surselva. Cun endisch combras d’hotel ed ina ustria han els buca vuliu metter en pei in menaschi memia grond. Il hotel Surselva, situaus amiez Surcuolm, ei lu era s’integraus optimalmein el maletg dil vitg. Biars onns ha il hotel giu in bien num. Hosps ed indigens han adina appreziau l’ustria e la buna adressa culinarica. Fiastas da famiglia e da fatschenta, tscheinas da Nadal, nozzas, reuniuns da classa ed autras caschuns passentadas leu ein en buna memoria. Ils investurs ein daferton vegni sils onns ed els ein secunvegni da reglar la successiun cun quei menaschi turistic el Grischun. Els han anflau investurs indigens ch’ein motivai e promts da s’engaschar pil hotel Surselva. La devisa da quels eis ei da buca mo tschintschar ch’ei drovi structuras novas e spitgar, mobein da crear sez quellas. Kevin Brunold ei carschius si a Surcuolm. Ensemen cun siu bab Hiazint Brunold eis el conproprietari dalla Cuolm Sura Gastro SA, el presidiescha il cussegl d’administraziun da quella societad. Igl econom da menaschi diplomau ei cussegliader da fatschentas e vischnauncas ed ha era experientscha el sectur turistic. Surprender il hotel Surselva en siu vitg nativ ei stau ina caussa dil cor. La nova societad ha tut interess da menar quei menaschi en in bien futur. Culla midada da possessurs ei il mument era vegnius da renovar il hotel Surselva. La stad vargada ei quel staus serraus. Ferton ch’ils possessurs han midau nuot vid la fatschada externa han ins renovau igl intern dall’ustria. Il lenn ed il crap rendan il local pli clars ed amicabels. Vitier eis ei gartegiau d’engaschar Bea Castelli e Frank Mossmann sco novs gastronoms e meinagestiun dil menaschi. Duront 13 onns ha il pèr menau l’ustria Burleun el territori da skis da Breil-Vuorz-Andiast. Ussa seigi il mument staus cheu da far la midada, ha Castelli raquintau. Ell’ei carschida si a Brinzauls e Cuera. Siu bab ei staus igl impressari Otto Castelli, sia mumma Rita, naschida Venzin, fuva da Mustér. Ell’ei indigena e sesenta era sco tala. Mossmann ei vegnius avon 30 onns sco giuvenot digl Uaul ner sur il Rein en Svizra. Communablamein sestentan il cuschinier e la hoteliera per ina suletta caussa: «Nus dein tut per ch’il hosp sesenti bein tier nus», sincerescha Bea Castelli. Siu consort cuschina tratgas che s’accordan culla regiun, la carta culla purschida cumprova quei. Mossmann porscha la cuschina grischuna, spir bunas caussas, per prezis reals ch’in e scadin sa pagar.