Terminau igl engaschi al guvernagl

(anr/ac) Ernst Mark, Daniel Jörg e Leo Tschuor termineschan sin la fin digl onn lur engaschi professiunal al guvernagl digl auto da posta. En preschientscha dil menader dad Auto da posta Surselva Marcus Büchler ed igl interprendider Stefan Fontana han els astgau retscheiver ina distincziun per lur engaschi la gievgia vargada a Glion. Dabia ei semidau el decuors da passa 30 onns ella reit da vias da Glion en divers vitgs ed uclauns sursilvans. Ed era la forza e la tecnologia dils autos da posta ein buca da paregliar cun ils vehichels d’antruras. Dallas midadas al guvernagl digl auto da posta han Ernst Mark, en survetsch sco manischunz digl auto da posta dapi 36 onns, e ses collegas saviu palesar. Daniel Jörg terminescha il medem survetsch sin la fin digl onn suenter 31 onns. Ils davos onns ha Jörg, per motivs da sanadad, stuiu desister da tgamunar igl auto da posta ed ha surpriu autras lavurs en incumbensa parziala enteifer il Survetsch autopostal.

La vegliadetgna da pensiun contonscha medemamein la fin digl onn Leo Tschuor da Rueun. El ha brattau avon sis onns il guvernagl digl auto da vitgira cun quel digl auto da posta. L’incumbensa al guvernagl ei dapli che sulet tgamunar igl auto da posta, il manischunz ei persuna da contact per la clientella ed ha regularmein da dar plaid e fatg a hosps da vacanzas davart la regiun e sia purschida. Entras l’introducziun dall’atgna controlla da bigliets ch’ha descargau ils manischunzs dils autos da posta dalla controlla ei il contact cun la clientella buca pli aschi stretgs sco antruras, han ils treis manischunzs explicau. Els che van en pensiun la fin digl onn han prestau survetsch da Glion anora els vitgs sursilvans.

E la lavur al guvernagl han els valetau sco interessanta e varionta, pli pretensiusa duront igl unviern che duront la stad. Mark ha discurriu da biaras reminiscenzas positivas e getg da schar dalla vart schabetgs forsa stai meins emperneivels. El, da derivonza dalla Tumliasca, ha bein capiu la tschontscha dalla part romontscha da sia clientella ed ha getg d’haver vendiu ils bigliets per romontsch. Antruras seigi el denton vegnius plidentaus da singuls Romontschs per tudestg ault e la declaronza che la Tumliasca sesanfli egl intschess da Tusaun seigi vegnida rispundida cun la declaronza che Tusaun sesanfli ella vischinonza dalla Svizra. Ils treis manischunzs ha viu dabia midadas el decuors da lur lavur professiunala. Il diember dils cuors dad auto da posta ei s’augmentaus ed ils temps da viadi dils singuls cuors ein sesminui per bunamein ina tiarza. Il svilup tecnologic ha bein purtau levgiaments, denton alzau il ritmus da lavur. Il vandalissem en igl auto da posta, avon biebein 10 onns dètg derasaus, ei pli u meins svanius, sco quei ch’igl interprendider Stefan Fontana ha explicau. El ha getg che la giuventetgna seigi ozilgi fatschentada cun lur telefonins ed hagi cheutras buca pli liber maun per sefatschentar cun il mobiliar digl auto da posta. Dad in ni l’auter donn da stuors ein era ils manischunzs buca stai schanegiai e lur liung temps da survetsch, dad accidents pli gronds tuttavia.

Leds ei il menader dil Survetsch autopostal en Surselva, Marcus Büchler, ch’ils manischunzs pensiunai stattan vinavon a disposiziun per surprender ina ni l’autra incarica al guvernagl. Da temps da vacanzas ni sch’in manischunz croda ora anetgamein en consequenza dad ina maldispostadad. E per ils pensiunai lubescha quella soluziun dad ina ga ni l’autra turnar e prender plaz en in vehichel nua ch’els han passentau biaras uras da lur veta professiunala.