Fanfaras e tuns migeivels

DA PAUL DUFF / ANR

Il fatg ch’il concert festiv per la fin digl onn, il qual il dirigent Simon Camartin dat dapi plirs onns cugl Orchester INSO da Lemberg e solists, ei vendius ora jamnas avon la producziun documentescha la gronda spetga dil publicum sin quei eveniment. Uonn eis ei buca stau auter ed ils presents ein vegni recumpensai il venderdis vargau cun musica orchestrala, cun parts solisticas e cant solistic dad aulta qualitad. Concert festiv per Nadal e Daniev stat ell’affischa e l’uvertura cun las fanfaras dalla «musica dil fiug bengal» da Georg Friederich Händel ha regurdau vid l’annunzia dalla naschientscha dil Salvader entras ils aunghels. Ladinamein ei suandau dil medem cumponist il cant ruasseivel, penetront ord igl oratori «Messias». Igl aunghel ch’ha purtau l’annunzia als pasturs ei stada la mezzosopranista Christina Daletska. Cun sia vusch caulda ha ella derasau legria e dignitad. Acceleront en sferas festivas cuntinuescha il fil dil concert cun il valser «Sphärenklänge» da Joseph Strauss e la canzun romantica «Mon coeur s’ouvre a toi» da Camille Saint-Saëns cantada puspei en tuns colurai da Daletzka.

Sper tonta intimitad han tuttina paucas e trumbettas procurau per slontsch ed attratg l’attenziun, en special las uverturas «Die lustigen Weiber von Windsor» (Otto Nicolai) e «Die leichte Kavallerie» (Franz von Suppé) sco era polca ed il valser da Joseph ed Eduard Strauss. La sopranista Daletzka ha demonstrau cun l’aria «Una voce poco fa» ord «Il barbiere di Sevilla» (Gioachino Rossini) igl entir spectrum cantic da sia vusch. Cun buccas aviartas e sesend tut agradsi sin las sutgas han ils presents gudiu la melodia, smarvigliau dallas coloraturas flessegiontas e dalla presenza vocala dalla cantadura. L’interpretaziun senza macla ei mussament pertgei che la simpatica giuvna, che viva el cantun Argovia, ei engaschada dad impurtontas casas d’opera e conta sin tribunas internaziunalas da renum. Per il pli grond smarvegl ha denton la pianista Bogdana-Alexandra Grecova procurau. Ell’ei cumparida sco ina diala sin tribuna e surpriu l’attenziun dall’entira sala e teniu ils presents en tensiun sur ina mes’ura. Sil clavazin ha ella interpretau il concert per orchester e clavazin nr. 23, KV 488 da Wolfgang Amadeus Mozart. La solista ella zarta vegliadetgna da quendisch onns ha sunau en perfecziun las treis parts accumpignadas digl orchester. Admirabel co quella giuvna fadetgna ha teniu la concentraziun tochen igl accord final. Cun in surrir cordial, gie bunamein timid ha ell’acceptau l’ovaziun da respect ed admiraziun ch’il publicum ha purschiu ad ella.

Promover ils talents 
gia en giuvens onns

Bunamein en mintga concert presenta Simon Camartin in ni ina musicista giuvna cun duns tut specials. Nus havein giu marveglias co quels musicists vegnan formai e promovi ell’Ukraina e possedan en giuvens onns ina cumpetenza musicala elevada. Maria Tkachik ei l’emprema violinista e meina-orchester e fa quella funcziun gia el sisavel concert cheu en nossa regiun. «In affon da sis onns cun duns musicals sa frequentar ina scola speciala cun in’instrucziun intensiva el rom da musica.» Aschia sa ella explicar ed aschunta «tala scolaziun hai jeu persunalmein gudiu e sun oz violinista da professiun.» Quella pusseivladad vegn purschida els gronds marcaus dalla tiara ed ord las classas vegnan ils giuvenils promovi ed engaschai per turneas da concerts dils orchesters. In musicist ni musicista arrivada sa denton buc exister e nutrir ina famiglia sulet cun far musica classica. El ni ella drovan in’occupaziun supplementara sco per exempel dar instrucziun musicala sper igl engaschament en in orchester. Biars musicists enqueran lur ventira e success egl exteriur, mo la sfida ei zun gronda e la schanza da reussir malguessa. Musicists talentai ein visai vi sin promoziun. Perquei ei igl engaschament che Camartin fa cun musicists giuvens dallas tiaras digl ost, l’Ukraina e Moldavia, da grond’impurtonza. «Pli gronds ch’il spectrum musical d’in ni ina musicista ei e pli gronda ei la schanza da far musica classica e vegnir engaschaus en in orchester ni en ina formaziun musicala. Jeu vegnel egl avegnir a seconcentrar sin musica da combra en in ensemble pign e quentel che nus saveien far carriera sil plaun internaziunal.» Quei di la simpatica musicista e nus giavischein ad ella bien success.

Il concert festiv per Nadal e Daniev ha purschiu musica tarlischonta. Il publicum ha engraziau agl orchester ed allas solistas cun in’ovaziun sincera. Camartin ha sentiu il plascher e l’euforia da ses amitgs dalla regiun. Els han gia oz marcau il termin per il proxim concert e spetgan cun brama sin quel che suonda en in onn.