Per hosp ed indigen

Da Giusep Venzin / ANR

Degen enconuscha las fuolas da glieud. La stad semovan las fuolas digl open air plitost agl ur dil vitg, la sonda vargada tras las vias e streglias. Il vischinadi da Degen dalla vischnaunca Lumnezia ei puspei stada en roda d’organisar il Marcau Daniev. Quei marcau cun la pli gronda part products indigens ha ina ga dapli attratg melli persunas. Malgrad la bellezia aura e pistas da vaglia han biars vuliu nezegiar ina dallas davosas caschuns digl onn per ina scuntrada. Il Marcau Daniev ei sco era las autras fieras da Nadal e Daniev dapli il liug da scuntrada che da cumpra, mo cun quella caschun san ins far omisduas. Ils purs indigens – mo in pur da Laus – han fatg amogna caschiel, ovs e carn – schetta e schambun e ligiongias seccas da tuttas sorts. Dasperas han auters offeriu il mèl d’aviuls dalla davosa raccolta ed alla meisa dasperas han ils visitaders saviu cumprar aunghels ni vinars. Art ed artisanadi han ins viu dabia als 41 stans dil Marcau Daniev a Degen. Igl ei allura era stau grev da sparter igl art digl artisanadi, mo savens selai quei era buca sparter. Per la bucca ein ils fins daguots, il caschiel d’alp savurus e la carn secca en scadin cass dapli art ch’artisanadi. Perquei ein ils stans cun quels products era stai occupai bein.

Ina viseta al Marcau Daniev ha Marcus Caduff fatg avon ch’entscheiver sia nova plazza a Cuera. Schebein el ha cumprau proviant per temps pli dirs ei buca stau d’eruir. El ha en scadin cass visitau il stan dalla pcd. Plirs exponents dalla partida han rimnau leu suttascripziuns per in’iniziativa che vul frenar ils cuosts dil sectur da sanadad – e sco els han puntuau – buca per la petiziun encunter il celibat. Quei haveva la bucca nauscha dil redactur dall’Agentura da novitads rumantscha supponiu.