Adia 2018, beinvegni 2019!

da Kevin Brunold*

Puspei ei in onn vargaus ed il niev ha gest entschiet. Mo tgei onn che quel da 2018 ei staus! Jeu vegn aunc gitg seregurdar, pertgei ei ha dau puncts culminonts in suenter l’auter. L’entschatta digl onn ei stada dominada da preparativas per differents projects. Igl ei era stau il temps intensiv dil cumbat electoral. Cun l’elecziun honorifica da Marcus Caduff e Mario Cavigelli en la regenza ha ei dau per mei in emprem punct culminont. Suenter 20 onns ha la Surselva reconquistau in sez ella regenza e la pcd siu secund sez ella regenza. Tgei sensaziun!

In’jamna pli tard ha il 25avel Tir cantunal 
Grischun entschiet. La davosa gada ha la Surselva organisau quella fiasta egl onn 1987, pia avon 31 onns. Quei demuossa con extraordinaris che quei eveniment ei. Il Tir cantunal ei staus per treis jamnas omnipresents en l’entira Surselva. Sogn Pieder 
ei era staus fetg generus 
ed ha schenghegiau als 
bunamein 8000 tiradurs ord l’entira Svizra la pli fina bialaura. Dapertut buna luna, fatschas rientas e cuntenzas ed ina grondiusa reclama per nossa 
regiun.

Dil sport da tir ha ei lu midau alla cultura. L’Opera Viva a Sursaissa Mundaun ha dau il toc «Carmen». Sut la bitgetta da Gion Gieri Tuor han il Coro Opera sco era la Filharmonia Opera Viva procurau per grondas emoziuns ed ina tenda pleina.

Tgei hai jeu empriu da quellas treis occurrenzas el 2018? Sch’ins vul ch’in project hagi success, lu san ins buca far quei persuls. Ins sto luvrar ensemen. Ei drova ina ferma equipa cun persunas che possedan differentas experientschas e qualitads. Enteifer l’equipa cumpleteschan els in l’auter.

Quei ch’ei drova vinavon ei curascha. Ei drova per in team curascha per ir vid in project che para a prima vista fetg pretensius ni schizun illusorics. Sch’ina buna equipa vegn ensemen, lu san ins schizun dumignar fetg grondas finamiras. In onn avon las elecziuns havessen forsa buca biars mess patg che Marcus Caduff daventi el 2018 cusseglier guvernativ. Entgins meins pli tard eis el vegnius eligius cun il tierz meglier resultat en la regenza. Il medem cu ils emprems discuors pertuccont il Tir cantunal han giu liug: Co duei ei esser pusseivel da coordinar in’occurrenza cun stans spatitschai en 14 differents loghens per l’entira Surselva entuorn? Co duein ins puder engaschar aschi bia gidonters voluntaris? Il resultat ei la finala stau ina fiasta cun fetg biars gidonters motivai, pli biars hosps che spitgau ch’ein schizun stai incantai sco era ina grondiusa experientscha communabla da biaras Sursilvanas e biars Sursilvans? E tier l’Opera Viva, cons han cartiu avon 14 onns che l’Opera Viva existi aunc egl onn 2018 e presenti cun «Carmen» in dils grond hits el mund dall’opera?

Per igl onn 2019 vi jeu prender per cor las experientschas dil 2018. Nus stuein haver curascha da luvrar vid finamiras fetg pretensiusas. E nus stuein luvrar communablamein sco in’equipa per dumignar quellas finamiras. Lu daventa era il 2019 in grondius onn.

* Kevin Brunold, Surcuolm, econom da menaschi, deputau.