In onn nov – cun vegls propiests

(cp) Prender giu, baiver pli pauc, chalar da fimar. Quai èn be in pèr exempels per propiests ch’in u l’auter vuless bugen realisar l’onn 2019. Tuttina gartegia quai betg adina sco giavischà. Sch’in onn nov cumenza èn els puspè qua – ils buns propiests. Far dapli sport u mangiar pli sanadaivel èn propiests classics. Tuttina èsi mintga giada grev da tegnair en quai ch’ins ha prendì avant. Tenor in studi da perscrutaders da la Gronda Britannia na san 88% da las persunas betg tener en ils propiests. Gia suenter trais mais vegn la mesadad ad emblidar ses propiest. Jürgen Margraf, professer da psicologia a l’Universitad Bochum, è sa fatschentà cun il tema propiests. El declera il fenomen uschia: L’uman vul avair la controlla da sia vita. Cun far propiests sa senta el bain e crai d’avair sut controlla sia vita – tuttina sch’el cuntanscha ses propiests u betg. Unic la cretta saja impurtanta, di Margraf. Plinavant è Margraf persvadì che l’emprim di da l’onn nov muntia insatge spezial. Cunquai ch’igl è l’emprim di da l’onn crai la glieud ch’i vegnia a gartegiar meglier – quasi suenter il 
patratg: In onn nov – ina nova pussaivladad.