Access per Plan da Muglin e zonas da fabrica

DA FLURIN ANDRY / ANR

Quist on realisescha il cumün da Valsot ün nouv access per sia zona da mansteranza a Plan da Muglin. A Tschlin prevezza il cumün da s-chaffir üna zona da fabrica ed a Ramosch dad impitschnir quellas existentas. Zonas da mansteranza sun in Engiadina Bassa retscherchadas. Siond cha las zonas d’industria a Sclamischot ed a Martina d’eiran occupadas ha il cumün da Valsot s-chaffi a Ramosch la zona d’industria Quadrasecha ed ingrondi per üna hectara la zona da mansteranza Plan da Muglin. L’attach da quella zona illa via chantunala nu correspuonda però a las normas actualas. «Il chantun ha dat perquai il permiss per ingrondir la zona da mansteranza a Plan da Muglin be culla cundiziun chi’s fabricha üna nouva via d’access», disch Victor Peer, il capo da Valsot, «da fabrichar ingon quist access es perquai sgüra üna da las grondas sfidas pel cumün.»

Insembel cun l’uffizi 
da construcziun bassa

Quist proget per cuosts da var 1,6 milliuns francs cumainza il cumün a realisar al principi d’avrigl. «Quella jada realisescha eir l’UCB seis proget da renovar e fabrichar oura la via chantunala tanter la Punt Pedra e Tschern», declera il capo, «il chantun po deponar sün nos terrain material cha no dovrain per fabrichar l’access e no survgnin illa Storta da Fet sülla via chantunala ün terz vial per sortir e rivar giò’n Plan da Muglin.» Fin d’utuon sarà quella via d’access pronta per gnir surtratta culla prüma vetta d’asfalt. L’UCB douvra la nouva via d’access per schlargiar la via chantunala tanter la Storta da Fet e la Punt Pedra. «Cur cha quista lavur es a fin surtraina insembel cun els da l’UCB la via d’attach cun l’ultima vetta d’asfalt», disch Peer.

Zonas da fabrica 
per famiglias giuvnas

A Vnà vain ingon realisada la seguond’etappa dal proget infrastructura in cumün. Per var 1,4 milliuns francs vain missa eir illa part suot da la fracziun da Valsot tuot l’infrastructura, «electricità, aua, aua persa, chanalisaziun», illa via in cumün. Eir qua vain surtratta la via cun salaschada. «Eir a Ramosch esa da metter l’infrastructura amo in ün’ultima part da las vias in cumün», manzuna Peer. In tschellas fracziuns es l’infrastructura in ün bun stadi. «La sfida a Tschlin chi nun ha actualmaing plü ingüna zona da fabrica es ingon da pudair spordscher üna tala zona cun lö per var ses, set chasas», cuntinuescha il capo. A Chaflur ed a Martina sun las zonas da fabrica grondas avuonda, a Ramosch suna dafatta massa grondas e ston gnir impitschnidas. «No eschan fingià ün ter temp landervia a trattar cun chantun e confederaziun lasupra, daspö passa ün on es nossa proposta a Cuoira per l’examinaziun preliminara.» Il capo spera cha’l cumün da Valsot survegna dürant il prüm quartal da quist on resposta dal chantun. Progets chi toccan al cumün da Valsot sco patrun d’fabrica e chi vegnan finanziats da la Regiun EBVM sun dad üna vart la via da velos ad Ovella: «Quell’etappa esa previs da fabrichar quist on», infuorma Peer, «important pella regiun es eir cha no possan ingrondir sco previs la deponia da Prà Dadora i’ls contuorns da Vinadi.»