Cumpara en 17 000 exemplars

(anr/gc) Ella numera dil schaner 2019 dil Fegl parochial grischun fa Wally Bäbi-Rainalter, Flem – ella ei presidenta dalla cumissiun da redacziun – beinvegni als lecturs dall’Engiadina. Las pleivs catolicas engiadinesas han era abonnau il Fegl parochial grischun. Quel cumpara uss en 17 000 exemplars. Las pli biaras pleivs catolicas dil Grischun – aunc mauncan denton zacontas dalla Surselva – han abonnau quei impurtont e beinredigiu organ d’informaziun dalla baselgia catolica cantunala.

A siu temps ei il Corpus Catholicum sestentaus fetg per realisar il Fegl parochial grischun en tuts treis lungatgs cantunals. Il november 2014 ei ina numera d’emprova cumparida. Il mars 2015 ei l’uniun purtadra dil Fegl parochial grischun vegnida fundada. L’emprema numera ei cumparida la stad 2015 en 12 500 exemplars. Quei fegl parochial vegn edius 11 gadas ad onn. Per il fenadur ed uost datti mintgamai ina numera dubla.

En treis onns ei il diember d’ediziun dil Fegl parochial grischun s’augmentaus da 12 500 sin 17 000 exemplars. Ina carschen considerabla.

Il Fegl parochial cantunal sepresenta era graficamein bein cul program mensil dallas pleivs colligiadas. Plinavon cuntegn el aunc bia orientaziuns ed informaziuns ecclesiasticas sco era contribuziuns che s’occupeschan da quei che concerna la baselgia catolica diocesana e mundiala.