Domenic Andry: «Sablun» – en rumen

(anr/gc) En la revista «România literara», edida dacurt da l’Uniun dals scrivents rumens, ha l’enconuschenta romanista Madleina Popescu-Marin, Bucarest, preschentà il scrivent e poet Domenic Andry, spezialmain en connex cun sia nova ovra lirica «Sablun». Quella è vegnida publitgada l’onn passà tras la Chasa Editura Rumantscha a Cuira. Quai è era succedì en connex cun il fatg che Domenic Andry è vegnì distinguì l’onn passà cun il Premi svizzer da litteratura. Madleina Popescu-Marin è sa messa vid la translaziun da «Sablun» dal vallader en rumen. Ella ha gia tant sco vertì l’entir’ovra en ses linguatg. La buna collavuraziun tranter autur e translatura haja schlià ils problems difficils. Tenor Popescu-Marin fa il volum da poesias «Sablun» era part dal moviment postmodernist da noss temp, ma è tuttina collià tras milli fils cun ils antecessurs ed autras orientaziuns litteraras sco tar Luisa Famos ed Andri Peer. En ses tom liric «Sablun» avra il poet engiadinais a ses lecturs ils egls per quai che para d’esser banal e las ureglias per la relaziun multifara da «sun e senn». Andry enconuscha bain la ritgezza lexicala da ses idiom vallader e construescha cun metafras vivas e frestgas ord in material linguistic genuin. Naschì è Domenic Andry 1960 a Turitg e creschì si a Ramosch. Ussa viva el a Zuoz. Studegià ha el romanistica a l’Universitad da Turitg. El è vegnì distinguì pliras giadas: 2003 ha el retschavì il Premi da renconuschientscha dal chantun Grischun, 2009 il Premi svizzer da Schiller e l’onn passà il Premi svizzer da litteratura da l’Uffizi federal da cultura. Ultra da sia activitad litterara redegia Andry dapi 2014 las «Annalas» da la Societad Retorumantscha e contribuescha er als «impuls» dal Radio Rumantsch.