Ils treis sogns Retgs

da sur Alfred Cavelti, Glion

Eri veramein treis? Ed eran quels retgs? Igl evangeli di nuot da retgs ed era la cefra treis vegn buca numnada. S. Mattiu tschontscha da sabis ch’ein vegni digl Orient. Daco lu la veglia tradiziun populara dils treis sogns Retgs?

Per l’ina san ins declarar quei neu dils schenghetgs ch’els han purtau al bambin: Aur, entscheins e mirra. Quei ei buca mo piculezas. Ei setracta cheu da fetg custeivels duns che dattan perdetga dalla beinstonza da quels ch’han purtau els. Gronds, custeivels schenghetgs che buca mintgin sa purtar. Mo zatgi ch’ha els. E tgi posseda talas custeivladads? Retgs e reginas, silmeins avon onns eri aschia. Pia ha il pievel fatg retgs quels sabis, en vesta als duns purtai agl affon divin. E damai ch’igl evangeli plaida da treis caussas: aur, entscheins e mirra han ins supponiu ch’ei seigi stau treis retgs. Quei ei ina declaronza.

Per l’autra demuossan quels umens ina tenuta roiala, e quei el senn cristian. Tgei vi jeu dir cun quei? Esser retg ni regina el senn cristian munta buca haver sez pussonza e beinstonza, mobein sefidar cun cor ed olma sin Cristus, il ver retg dil mund, metter Cristus el center dalla veta. E quei han quels sabis veramein fatg. Els ein semess sin via per encurir Cristus. Ei han fatg tut il pusseivel d’anflar el. Herodes ha buca cuntentau els. Els han tschercau vinavon ed anflau il Salvader. Segiramein autruisa che quei ch’els vevan cartiu: In affonet ella paupradad d’in nuegl. Avon quei affon ein els s’enclinai, han adurau el. Ed els ein lu semess vinavon sin via, quella ga encunter casa. – Esser retg/regina el senn cristian munta: Esser semper alla tscherca dil Cristus, encurir el cun cor ed olma, buca resignar, mobein s’orientar vid enzennas, persunas, segns che meinan tier el. Esser retg/regina el senn cristian munta vinavon: Adurar Cristus, star en schanuglias avon el e guder sia preschientscha: ell’oraziun, el survetsch divin. Esser retg/regina el senn cristian munta: Haver tutta reverenza e tut respect avon il concarstgaun, e sche quel ei aunc aschi pigns e fleivels sco il nievnaschiu ella stalla da Betlehem, e veser en quel la fatscha dil salvader dil mund sco ils sabis digl Orient han fatg.

Essan nus en quei senn retgs e reginas, en nies temps, en nies mund? Jeu giavischel che nus tuts meien nossa via tras igl onn niev aschia che nus dettien perdetga da nossa dignitad roiala, regalada da Cristus ad in e scadina da nus el batten.