Zatgei capeta en Lumnezia

(anr/abc) La Fundaziun da cultura Lumnezia, la vischnaunca politica Lumnezia e l’Uniun da teater Cuschnaus realiseschan communablamein il project «spitachel 2021». Il dramaturg Roman Weishaupt ha lantschau las preparativas. Roman Weishaupt, dramaturg e regissur diplomau, ha surpriu l’incumbensa da trer ils fils ed organisar il spitachel 2021. Sco el ha declarau dacuort a caschun dall’orientaziun publica senumna il project «las valerusas». In project communabel ligia e colligia, cun in tal san ins scaffir e rinforzar l’identitad. «Daventar pertscharts dall’ierta culturala, scaffir communitad e ligioms emoziunals» ei la devisa dil spitachel 2021 en Lumnezia. Il libret leutier vegn Weishaupt a far ils proxims meins sin fundament da quei ch’ei avon maun. Ed igl ei bia, fetg bia. Il dramaturg vul involver aschi bia glieud sco pusseivel el project, tuttas generaziuns e tuts vischinadis. Denter Porclas ed il Péz Terri vulan ins trer a nez igl entir potenzial cultural dalla Lumnezia. Era ils possessurs d’habitaziuns secundaras, adherents e fans dalla vallada, dueigien quella gada esser integrai. Quei ch’ei buc aunc clar ei il liug dil giug el liber. Ils loghens pusseivels vegn la gruppa ad evaluar questa primavera. Il tetel «las valerusas» ei annunziaus e lantschaus ed il motor dil spitachel ha entschiet a girar.

pagina 5