Denter tradiziun e moderna

Da Hans Huonder / anr

La catscha da milissa ei in privilegi, mo ella vegn tschentada pli e pli en damonda entras iniziativas. Ellas ein denton mo ina part che fatschenta ils catschadurs en Svizra il mument. En sia revista sigl onn 2018 tematisescha il president da Catscha Svizra, Hanspeter Egli, denter auter era la revisiun dalla lescha da catscha federala. Quella pertucca era novaziuns concernent la regulaziun dils animals da rapina ni era dil castur. Ils cantuns duein survegnir dapli cumpetenzas en quei connex. Egl avegnir duei il dretg denton era lubir igl engaschament d’apparaturas opticas per saver sittar animals la notg. En special patratgan ins en quei connex vid la catscha da pors selvadis ch’ei fetg difficila. Ina regulaziun dalla populaziun carschenta dils pors selvadis ei necessaria denter auter en connex cun la problematica dalla pesta da pors africana. Pertuccai il mument ein ils catschadurs svizzers denton era dil dretg d’armas. Encunter quel vegn priu il referendum.

Pagina 5