Interess sco anc mai

(anr/gns) Ina bilantscha fitg positiva fan ils organisaturs da la 6avla ediziun dal «Guaud magic» a Lai. Danovamain è il dumber dals visitaders s’augmentà en cumparaziun cun l’occurrenza 2017. Il comité d’organisaziun cun Giancarlo Pallioppi al timun è impressiunà dal grond interess per la 6avla ediziun dal «Guaud magic» ch’ha gì lieu a Lai dal mez da december fin a la fin da l’onn 2018. L’onn 2013, tar l’emprima ediziun, aveva l’occurrenza attratg passa 10 000 persunas e tschintg onns pli tard èn quai stadas 44 000 persunas. En cumparaziun cun il dumber da visitaders da l’onn 2017 sajan quai tuttina 4000 dapli visitaders, punctuescha Pallioppi. L’ediziun actuala saja tenor ils visitaders stada la pli attractiva, menziuna il president dal comité d’organisaziun. Per l’emprima giada han ils organisaturs renunzià ad in cussegl professiunal da spezialists per installaziuns da glischs e cunzunt collavurà cun l’artist indigen Primo Berera.

pagina 9