Rabius segida

Ils ustiers dil hotel Greina, Barbara ed Andreas Baselgia, han giu, ensemen cun l’uniun da dunnas, ina speciala idea duront il temps d’advent. Duront quellas quater dumengias, la sera denter las tschun e las siat, han els purschiu ina buna suppa da giutta, vin cauld e piziulta ord l’atgna cuschina. Damai che l’aura ei buc adina stada emperneivla han las sentupadas giu liug el tschaler da vin dalla Greina enstagl ordaviert.

La glieud ha gudiu legras uras da buna cumpignia. Els han saviu dar ina paterlada baul cun in e baul cun l’auter ed aschia ein las seras magari vegnidas pulit liungas.

L’autra buna idea sper il star da cumpignia ei ch’il recav dall’entira sviulta duront quellas dumengias ei ius en favur dalla «Wunderlampe». Ina grondiusa instituziun ch’ademplescha ad affons impedi ed a grevmalsauns in u l’auter giavisch fervent.

Grazia als generus donaturs dil vitg da Rabius e dils vischinadis sco era ord la regiun havein nus rimnau ensemen ina biala summa da 3250 francs. Cordial engraziament per vies grond sustegn finanzial.

En num da tuts engraziel jeu allas gidontras per tut la lavur prestada. In special engraziament a Barbara ed ad Andreas per la buna collaboraziun ed organisaziun ensemen cun l’uniun da dunnas.Ina convischina