En Oscar per Thabo Beeler

Da Peder Antona Baltermia

Mintg’onn ensacuras igl favrer ègl schi gliunsch. Cò vignan surdos a Los Angeles igls Oscars. Igls awards igls pi desideros per igls miglers films, actours etc. Ed alloura dattigl tants oters Oscars per prestaziuns spezialas an connex cun igl film. I dat er Oscars tecnics. Egn uscheia vign chest onn a Savognin tar Thabo Beeler. La nominaziun e la surdada digls Oscars è mintg’onn en ritual tgi sa spleia tenor reglas fitg cleras. Igl punct culminont è alloura la surdada digls premis la dumengia digls 24 da favrer 2019. Igl antier ritual scumainza pero gio oz glindesde cun l’avertura dalla fasa da nominaziun. Vot deir tgi igls miglers films digl 2018 cun lour actours dastgan neir proponias per egn u per ples Oscars. Chella fasa è relativamaintg curta e cozza exact en’emda. Igls 22 da schaner 2019 vignan alloura annunztgeidas las nominaziuns. A parteir digls 12 da favrer antscheva la votaziun antras igls commembers dall’academia tgi on la pussebladad da vurdar gratuitamaintg igls films nominos. La votaziun è en’emda siva, igls 19 da favrer. Ed alloura la surdada cun glischour e glamour an preschientscha da tot igls stars digl film ed er oters. La ceremonia cun la surdada digls omenets dad ôr dattigl digl reminent gio siva digl 1929 e la surdada è gio stada ainten igls pi divers lis a Los Angeles. Seia chegl ainten igl divers hotels, ainten teaters, auditoris, pavillons etc. Chegl tgi ins so forsa pi pac è tgi las surdadas digl 1954 anfignen igl 1959 èn stadas a New York. Schiglio adegna a Los Angeles. Gio dad onns è la surdada digls Oscars ena gronda tgossa mediala e la ceremonia vign emessa live dalla televisiun e chegl siva digl 1975 or digl Samuel Goldwyn Theater. Essend tgi la tgossa vign emessa direct dattigl er mintg’onn chels leghers e manc leghers incaps.

Oscars spezials

Dasperas igls Oscars igl migler film, la miglra reschia, igl migler actour, la miglra actoura, igl migler libret etc. anfignen tar igl migler film dad en oter lungatg (betg engles) dattigl er Oscars per scienza e tecnica. Chellas dus parts on gio dadei er ena ferma influenza sen igl svilup ed ansomma la realisaziun digls films. En tal Oscar dastga piglier ancunter chest onn Thabo Beeler da Savognin, sesent a Turitg.

Cun chels Oscars tecnics vo igl antier proceder en po oter. Chels vignan bagn surdos er a Los Angeles aint igl madem li, ma betg igl madem mument. Numnadamaintg gio igls 9 da favrer. E cuntrari digls oters Oscars so el gio oz tgi el survign chest premi. Igl mument è Beeler sur las Festas aint igl Grischun. Per part a Savognin tar igls sies genitours e per part a Tgazzas danonder tgi la sia donna dereiva. Ma schiglio èn els per en onn a Stanford. En’oura sgol davent da Los Angeles. Lò èn els betg perveia digl premi tgi el survign ed er betg perveia dalla sia lavour, mabagn perveia digl studi dalla sia donna.

Igl premi survign el er betg sulet, mabagn anc treis cun el tgi lavouran tar igl labor da perscrutaziun da Wald Disney a Turitg. Igl premi survignan els scu gruppa ed el è igl manader da chella. Igls 9 da favrer è damais la surdada e per chella reivan er igls sies genitours Brigitte e Cyrill Beeler a Los Angeles.

Igl premi per chella racunaschientscha è betg an furma digl omenet dad ôr, mabagn en certificat. Igls Oscars èn digl reminent betg premis dotos, mabagn da rancunaschientscha.

Siva digl 2008 tigl labor da perscrutaziun da Walt Disney

Ma tgi è Beeler (40) ansomma? Naschia è el an Africa e da lò dereiva igl sies prenom african. Igls sies genitours eran lez mument segl continent african noua tgi sies bab luvrava scu gioven medic. Igl 1983 è l’antiera famiglia neida a Savognin ed igl bab ò surpiglia la plazza da capomedic agl spital Surses a Savognin noua tgi el è sto anfignen tar la pensiun e veiva anc oz.

Thabo Beeler è sto a scoligna, a scola primara a Savognin ed è alloura sto a Mustér agl gimnasi claustral. A Turitg ò el alloura stibgia informatica e fatg igl tecnicum alla Scol’ota digl rom a Rapperswil. Siva ò el stibgia perscrutaziun alla ETH a Turitg e saro giu igls sies studis cun igl doctorat igl 2012. E scu gio menziuno lavoura el siva digl 2008 tar igl Disney Reserarch a Turitg. Ena filiala dalla Walt Disney Company an Calfornia, en concern da medias cun en stgamgiamaint annual da 55,5 milliardas ed en domber da 199 000 collaboratours. Ancunaschaint è igl concern nia an amprema lengia cun igls numerous films animos ed an general cun la producziun da films per unfants e giuvenils.

Ainten igl labor da perscrutaziun a Turitg lavouran 40–100 persungas. Beeler magna ena gruppa tgi sa fatschainta cun tecnicas da 3D tgi ò er influenzo ferm igl film. Els èn sa spezialisos sen l’animaziun dalla fatscha digl carstgang. Ena tgossa fitg scientifica tgi ò ossa survagnia ena rancunaschientscha mundiala.

Beeler è bab dad en mattatsch da treis onns e dad ena mattatscha da seis meis e stat cun la sia famiglia a Turitg.

La tecnica da 3D

La lavour tgi Beeler fò agl Disney Research a Turitg è ena lavour ferm scientifica. Atgnamaintg vogl per, betg scu anfignen avant divers onns mussar las persungas angal ainten las dus dimensiuns vertical ed orizontal, mabagn er ainten la terza dimensiun, damais 3D. Cotras davainta en film resp. las figuras pi realas e pi veiras.

Chegl ò antschet cun la fotografia cun ples cameras a madem mument da diversas posiziuns (fotogrametria). Ensatge tgi Beeler cun igl sies team on sviluppo da nov an perfecziun è da metter la fotografia an 3D er an muvimaint, uscheia quasi an 4D. Ed essend tgi ins s’occupescha tar igl Disney Research a Turitg dalla fatscha digl carstgang vot chegl deir tgi ins so er metter chella an muvimaint. Chegl è ena tecnica tgi vign duvrada tigl film ed è stada la raschung per surdar a Beeler ed igl sies team chest Oscar tecnic. Damais ena tecnica tgi vign duvrada tar la producziun da films sen igl antier mond. Igl sistem tgi la gruppa anturn Thabo Beeler ò sviluppo sa nomna Medusa.

Chesta tecnica vign betg duvrada angal tar films da Walt Disney, mabagn er dad oters producents. Tar Walt Disney dattigl pero films fitg ancunaschaints scu Star Wars, Spider Man, Maleficient – Die böse Fee cun Angelina Jolie. Egn digls pi novs films da Walt Disney cun chella tecnica è «Das Dschungelbuch», betg scu film animo, mabagn scu film real. E la lavour digl Disney Research da Beeler a Turitg è stada da dar a Mowgli, igl unfant digl gôt selvadi, l’expressiun ed igls muvimaints dalla sia fatscha. «Ainten l’episoda 7 da Star Wars digl 2016 gevigl betg per ramplazzar igl actour, mabagn per mussar la persunga er ainten situaziuns tgi ella savess realmaintg betg esser», declera igl ratschaveider digl Oscar tecnic. Igl sistem da Medusa è nia duvro bler ainten films tgi èn sur onns ossa films tgi vign massada raps ainten las cassas.

La pi gronda 
rancunaschientscha

Igl mument è chest «SCI-Tech-Award», scu el vign numno uffizialmaintg, la pi gronda rancunaschientscha tgi dat mundialmaintg sen chel camp: «Ea, ia sung fitg happy da dastgeir piglier ancunter cun igl mies team chest premi», dei Beeler.

Ò chegl influenza sen la sia lavour agl avigneir? La perscrutaziun seia tar els ena lavour cuntinuada e chella geia anavant. «Propa bungs ischans cura tgi ins s’accorscha aint igl film betg tgi igls muvimaints dalla fatscha èn fatgs da nous e betg digl actour.» El vign er a restar anavant a Turitg noua tgi vegian en gioven team fitg creativ. Digl reminent en team cun gliout digl antier mond.

Igl ple è Beeler a Turitg. I capeta tgi el ò dad eir da taimp an taimp a Londra e mintgatant an America. E tant scu pussebel vign el er agl Grischun, schi igl ple angal per curt taimp.

An chegl tgi pertotga la sia lavour ed igl avigneir da Disney Research a Turitg è la fegnameira da davantar qualitativ adegna miglers. E chegl cun pi pac angaschamaint da material e da taimp. E chegl vot er deir da saveir registrar la fatscha dad en carstgang scu film an taimp real, uscheia tgi chella stat gist a disposiziun per neir integrada aint igl film.