«Me» egna mueta riainta?

DA GIERI BATTAGLIA, RORSCHACH/VEULDEN

Sco ornitolog amatur vont jou regularmeing a spass cugl perspectiv, a mintgatànt ear cugl spievel lùng ple greav. Ple bòld, cur ca nus stevan ànc a St. Margrethen, nav’jou savens par las sieulas agl antschies da la «Cùa digl Asen», igl avànt-taragn digl Ragn, a par lùng digl Ragn Vigl. Davent da ca nus stagn a Rorschach spasseg jou savens par lùng digl Lai da Constanza; surtut davent dad Arbon, da Steinach, a la sbucada digl ual Goldach ne agl conturn da Rorschach noua c’igl dat adigna puspe da far interessàntas observaziùns. Ascheia salegr jou mintg’eada cur ca tschearn egn utschi pastgeader. Dacurt ve jou surprieu egna marlotscha da l’aua sper egn tgamon d’egn bogn, sper l’aua bunameing ergia. Quegl e egn’observaziùn fetg rara. Egna sfunseala pelusa trànter blearas sfunsealas cun cresta e egna culminaziùn par me. Ad igl matg pos jou strusch spitgear antoc’jou od puspe igl clom digls spirs. Mo ear las semplas sorts d’utscheals procuran adigna puspe par surpresas. Ascheia par sameglia egn pupen cotschen ca zacuda sco egn crivel, piclànd insects giod egn mir. Ne egn maset blau ca saragata cugl tgieu davàntor gio’ par egn best d’egna plànta sco igl petgarel. Ple poca atenziùn tgata par regla la graziusa mueta riainta. Probavlameing parquegl c’ellas en aschi numerusas a Rorschach. Tutegna, igl vala la fadeia dad observar ellas ple exactameing. Ve da lur tgombas satgatan qua a tscha aneals da metal ne da plastic c’inditgeschan zefras a bustabs. Quellas indicaziùns lubeschan da trer conclusiùns partutgànt la migraziùn da quels utscheals.

Igls 22 da dezember ve jou scuviert davent digl mir digl port egna mueta riainta cun ani, sasànd sen egna petga. Cumbagn c’igl pluschigneava leavameing mi e’gl gartagieu da liger la noda sen la marca da plastic melen: WC69. La mia observaziùn ve jou tarmess ànc igl madem gi a la Staziùn d’utscheals a Sempach. Graztga a la bùna cunlavur trànter igls instituts ornitologics europeans mi â la Staziùn d’utscheals pudieu dar part me sis gis ple tard igl savundànt: Quella mueta riainta e vagnida anelada sco gnivot igls 2 da zarcladur 2018 ad Ostrava (Tschechia). Otg eandas ple tard e’la vagnida observada agl Lai Rivàn! L’antscheata d’avust e’la saplatgeada a la sbucada digl Ragn Vigl. Igls 12 da dezember e’la vagnida observada par l’amprem’eada a Rorschach, a sco manzuno sura, la savund’eada igls 22 da dezember. Igl utschi e peia sto da vieadi durànt seglmains 203 gis. La distànza trànter Ostrava a Rorschach amporta 704 km. Cun satschantar qua a tscha vean ella ad easser sgulada an tut passa 1000 km. Quegl e egna prestaziùn remartgevla! Peia «me» egna mueta riainta?