Fatscha en fatscha cul luf

da Martin Cabalzar

El Grischun dat ei actualmein 15 entochen 20 lufs, reparti en dus tochen treis roschs. Ed igl ei da quintar che quei diember creschi aunc il proxim temps. Quei ha igl Uffeci cantunal da catscha e pesca confirmau sin damonda. Aschia han ins fastisau trops da lufs al Calanda, a Trin, el Grischun central e stiarsas in singul animal el Liechtenstein. Era en Surselva para il luf d’esser da casa adina pli stedi. Cuort avon Nadal ha Fabia Casutt da Falera saviu fotografar in’entira processiun da sis lufs en in’acla sut il vitg da Falera. Gronda ei la surpresa denton era stada per Flavio Früh (21) cu el ha engartau per pura casualitad sin ina tura cun gianellas sin l’Alp Tschegn Dado in luf sin cuorta distanza. Il giuven miradur da 21 onns, domiciliaus el cantun Turgovia, passentava gest sias vacanzas tier sia tatta a Breil. Sco fotograf da hobi passiunau haveva el priu la camera cun el silla tura cun gianellas cugl intent da fotografar utschals. Buca pauc surstaus eis el staus cu el ha engartau sur il cunfin digl uaul sin rodund 1900 meters s.m. in veritabel luf sin cuorta distanza. El hagi saviu observar e fotografar il luf en tutta ruasseivladad avon che quel hagi la finala percurschiu sia preschientscha s’allontanond allura cun in segl elegant egl uaul. Cun excepziun dil luf ch’ha scarpau la primavera vargada nuorsas a Medel e Sursaissa hagien ins giu el decuors da 2018 negins indezis per ina preschientscha dil luf ella Cadi, di il guardiacatscha Ueli Jörimann.