La regenza en nova cumposiziun

(anr/gc) Otg dis suenter che l’onn nov ha entschavì, ier mardi, ha la regenza chantunala salvà l’emprima sesida da 2019 e dal mais. Il guvern cumpiglia uss dus novs commembers – Marcus Caduff (pcd) e Peter Peyer (ps) – e be umens. Suenter la seduta ha gì lieu l’emprim inscunter bain frequentà dal mais tranter la regenza ed ils represchentants dals meds da massa en noss chantun.

Il nov president da la regenza, cuss. guv. Jon Domenic Parolini, ha fatg in zunt cordial bainvegni ed exprimì ils megliers auguris per l’onn nov cun giavischar fortuna, sanadad e success. En num dals participants da l’inscunter ha Giusep Capaul, da l’anr, drizzà a la regenza ils buns auguris per l’onn 2019. El ha fatg quai per rumantsch, siond che la maioritad dals regents è da lingua rumantscha e tuts tschintg cussegliers derivan dal territori rumantsch. In salid spezial ha el purtà sco Lumnezian al nov cuss. guv. Marcus Caduff. Cun el saja la Lumnezia puspè represchentada – suenter in’interrupziun da 40 onns – en il guvern chantunal.

Sco quai ch’ins ha intervegnì sin dumonda – ed era spetgà – èn ils dus novs commembers da la regenza, Marcus Caduff e Peter Peyer, vegnids beneventads e retschavids fitg amicablamain dal collegi guvernativ. Er èn els vegnids introducids fitg bain tge e co tut sa splega tar las sesidas da la regenza e la lavur departamentala. I saja stà ina fitg bun’infurmaziun.

Dals 22–25 da quest mais ha il Forum economic mundial (FEM) lieu a Tavau. Dal comité guvernamental da quel fan part: ils cussegliers guvernativs Marcus Caduff e Peter Peyer sco er il cumandant da la polizia chantunala Walter Schlegel e ses vice.

Da l’avertura dal FEM prenda la regenza part en corpore. Commembers dal comité dal FEM sajan adina puspè preschents a Tavau. Per cuss. guv. Peter Peyer èsi – ussa sco schef dal departament da segirezza – ina nova sfida. Venderdi, ils 25 d.q. vegn il comité dal FEM a dar ina conferenza da pressa.