Reducziuns d’agid social periclitassan garanzia d’existenza

Sche l’agid social vegniss scursanì vinavant en Svizra periclitass quai la garanzia d’existenza. Per pertutgads muntass quai ch’els avessan mendras schanzas da puspè fitgar pe en la fiera da lavur. Quai tenor in studi da la Conferenza svizra da l’agid social (Skos). Tenor la Skos tanschia il basegn elementar tar l’agid social actual mo stgars per segirar in’existenza degna d’in uman. Quel munta oz a 986 francs il mais e persuna ed è per 60% pli bass ch’il basegn elementar tar las prestaziuns supplementaras. Il mument vulan divers chantuns svizzers scursanir il basegn elementar. Quant agid social che pertutgads retschaivan dependa dal basegn elementar. La Skos ha fatg il studi per intercurir cun tge consequenzas che pertutgads stuessan quintar sch’il basegn elementar vegniss sbassà. Las decisiuns ch’i ha dà enfin uss en la politica sajan vegnidas fatgas senza in’analisa d’experts e senza resguardar las consequenzas per persunas pertutgadas, uschia la Skos. Sch’il basegn fundamental actual vegniss scursanì per 8% avess ina famiglia da quatter persunas anc a disposiziun set francs per di e persuna per vivondas e products da giudiment. Cun ina reducziun da 30% stessan anc tschintg francs a disposiziun per talas expensas. Uschia na possia nagin sa nutrir a moda suffizienta u sanadaivla, scriva la Skos.