Igl atelier vegn el center

(anr/abc) La stad 2019 festivescha il reparader d’instruments da flad e scolast da musica Remo Derungs da Vignogn in giubileum. Sin lu duess el esser s’installaus el niev local e luvratori a Glion. En Surselva occupea el ina nischa. Ei dat buc in’autra tala fatschenta speciala. Egl entir Grischun dat ei mo treis «docters» d’instruments. Remo Derungs ei in da quels. El ha fundau il 2002, cun 26 onns, el marcau vegl da Glion ina fatschenta d’instruments. Treis onns avon, la stad 1999, haveva il giuven Lumnezian terminau siu emprendissadi ell’Argovia cul diplom federal da reparader d’instruments da flad. El ei staus igl emprem Sursilvan ch’ha frequentau quella scolaziun. Dapi lu ein 20 onns vargai e questa stad sa el festivar quei giubileum ellas localitads novas a Glion.

Il «docter» d’instruments

El ston ins dil reminent strusch presentar, s’auda el numnadamein tier las persunas empalontas dalla musica da brass en Surselva. Dapi 14 onns diregia Derungs la Societad da musica Vignogn. El ha daferton terminau il studi da jazz sin trumbetta. Dasperas meina el la Musica giuvenila Lumnezia, instruescha dus gis ad jamna alla Scola da musica Surselva, suna cornet ella musica da Cazas e separticipescha adina puspei a projects culturals. Ils davos onns ha el cooperau cun musicists sco Alexi & Marcus, Mattiu Defuns, Dario Hess. Era cul Teater dil marcau da Cuera tier la producziun «Der Dorfladen» da Roman Weishaupt.

Si’atgna fatschenta, il luvratori e stizun d’instruments a Glion, ei l’adressa per musicantas e musicants indigens e d’ordeifer. Entrar en quella stizun ei sco da sfundrar el mund dalla musica. Ins vesa quei e tschei, instruments da stuors e da lenn, ghitaras electricas, ins scuviera caussas interessantas – silmeins tgi ch’ha interess da musica. Dapi tschun onns e miez ei igl atelier da Derungs egl anteriur arsenal militar entadem la Via Santeri. Cheu dat ei corns, trumbettas e posaunas, mo era clarinettas, flautas traversas, saxofons e fagots. E naturalmein ils schumbers. Igl um da 42 onns ei mistergner rar. Ad el san ins purtar in «pazient», schar schubergiar quel, unscher ventils, reparar bottas, midar ora parts.

El center da Glion

En in meins bardeglia el il luvratori e la stizun, el vegn empau pli datier. Perquei ch’el ha sentiu ch’ei fuva ella Via Santeri memia lunsch naven dils passants ha Derungs entschiet gia dagitg ad encurir localitads el center. L’entschatta mars ei il termin ussa defintivs: El vegn ad occupar las localitads dall’anteriura Apoteca Sontga Clau. Igl ei la quarta bardigliada che Derungs sto far a Glion. Ussa spera el ch’ei seigi la davosa. Il specialist d’instruments dislochescha dalla Via Santeri alla Via dalla Staziun.

Buca mo per la scola da musica e las societads da musica dalla regiun ei igl atelier d’instruments a Glion in’adressa impurtonta. Deplorablamein renconuschan buca tuts il status d’ina stizun speciala unica. Sport e musica ei buc il medem. Daco pia? Mintga stagiun edescha l’organisaziun Surselva Turissem in guid pulpiu, ina broschura cullas purschidas ed attracziuns dalla regiun. Naven dils hotels tochen tier las massaschas ei tut registrau. Tuttas stizuns da sport, guids da muntogna, trekking cun cavals, Rufalipark, halla da squash, Cinema Sil Plaz, stizuns da calzers. La broschura dedicada al hosp cuntegn era ils museums e las gallarias, ateliers ed exposiziuns d’art, e naturalmein culinarica e gastronomia.

Part dall’experientscha 
da vacanzas

Autras informaziuns, naven dalla biblioteca tochen tier las mazlarias, cascharias e specialitads, ils beins purils cun vendita directa mauncan era buc. La suletta stizun en Surselva ch’offerescha instruments per far musica maunca. Musica, ch’ei gie sport e nutriment per spért ed olma. Igl atelier da Derungs exista buc ella broschura. In tal atelier da musica, buc auter ch’ina gallaria ni in’exposiziun d’art, ei medemamein part d’ina «historia», d’ina biala experientscha ella regiun da vacanzas. En Surselva dat ei dil reminent biars camps da musica e da cant. Che quel ei buc el guid dalla stagiun? Eis ei ina discriminaziun dalla cultura? «Na, segir buc», replica Katja Klee, la plidadra da medias da Surselva Turissem. Ei seigi semplamein aschia che la broschura stampada vegni mintg’onn pli e pli grossa ed els stoppien selimitar terribel cul plaz. All’anr confirma ella denton che la redacziun dalla broschura per la regiun turistica vegni a risguardar el futur la fatschenta unica e cun potenzial. Ella gi quei ed engrazia pigl avis.