Inizià progets in differentas fracziuns

DA FLURIN ANDRY / ANR

Daspö il principi d’october lavura Niculin Meyer pel cumün da Scuol sco promotur d’economia. El s’occupa tant da progets turistics sco eir da l’ulteriura economia cumünala. Seis büro es a Scuol in chasa cumünala. Niculin Meyer svessa però es suvent in gir eir illas fracziuns dal cumün. Il promotur d’economia da Scuol guarda nempe permanentamaing che chi’s pudess far per rinforzar l’economia da Scuol e fracziuns. Ün exaimpel da quists progets cha Meyer ha inzià fingià pertocca la sporta ad Ardez e Guarda: Quist inviern ha pudü gnir drivida üna via da schlitras giò da l’Alp Murtera Dadaint. «Per procurar cha quista via gnia eir dovrada vain sport dürant l’inviern sün l’alp tschinch jadas ün giodimaint da cumpagnia cun schoppa choda», declera il promotur d’economia. Ün oter exaimpel pertocca il trafic public: «Las colliaziuns culs bus da skis illas fracziuns sun gnüdas optimadas, e quai sainza chaschunar daplü cuosts, anzi, i’ns es perfin gratià da spargnar da quels.» Sco ch’el agiundscha s’haja a Scuol optimà las colliaziuns fin in S-charl, «cun bus shuttles fin Sasstaglià e lura cun schlitras trattas da chavals.» Meyer dà üna survista da las incumbenzas ch’el ha sco promotur d’economia.

Insembel culs differents 
partenaris

Siond cha la pütta principala da l’economia da Scuol e fracziuns es il turissem s’occupa Meyer impustüt da progets chi han da chefar culla sporta turistica. Var 70 pertschient da seis temp da lavur impuonda’l per quels progets e’l rest pella promoziun da l’ulteriura economia cumünala. Ils böts in quel sectur sun definits per gronda part ill’Agenda 2030 sün livel cumünal. «In quella esa fixà tuot quai chi’d es d’importanza strategica pel cumün», declera’l. L’incumbenza da realisar ils böts definits in quist’agenda ha il cumün surdat a seis promotur d’economia. «Per far quai m’occupa p. ex. culs partenaris Bogn Engiadina e Center da sandà regiunal, insembel as guarda co chi’s po promouver il turissem da sandà», manzuna Meyer, «ün oter proget pertocca il sectur da scolaziun, i’s prouva da mantgnair sper las scoulas popularas eir la scoula media a Ftan.»

Optimar la sporta turistica 
eir illas fracziuns

Ill’Agenda 2030 esa eir fixà cha’l cumün vöglia intensivar la stagiun turistica d’instà per dvantar main dependents da l’inviern. Ma eir la stagiun fraida darà lavur al promotur d’economia: Ill’agenda es nempe defini eir il böt da mantgnair ed ingio pussibel eir amo rinforzar l’inviern turistic. «In quai chi reguarda la sporta turistica generala sco bogn, pendicularas, vias e sendas etc. examinaina co chi’s pudess optimar amo l’existent», disch Meyer, «vala p. ex. la paina da mantgnair la rait da tschients da kilometers sendas o füssa meglder d’avair damain, ma pella paja plü attractivas in oters lös?» Las respostas as chatta, sco ch’el disch, cun metter illas singulas fracziuns il focus sün differents puncts da la sporta turistica.»

Coordinaziun eir da 
progets interdisciplinars

Quai chi pertocca tant il turissem sco eir l’ulteriura economia sun progets plü gronds a lunga vista: Ün exaimpel es il Moutainbike-Masterplan, ün oter la reposiziun turistica da la sporta aua minerala. «No vain l’incumbenza da promouver da quists intents, declerond ed illustrond perche chi vala la paina dad investir in tals progets», explichescha Meyer, «il prossem pass es lura da güdar a realisar ils differents progets.» Quels chi fan quista lavur han adüna da chefar cul cumün. «Il cumün nun es però üna persuna, üna jada pertocca quai l’uffizi da fabrica, üna jada il capo ed üna terza l’uffizi da finanzas», manzuna’l. E per cha’ls iniziants e realisatuors da progets in cumün nun hajan da discuorrer mincha jada cun inchün oter daja daspö tschient dis üna persuna centrala chi coordinescha quels progets, nempe il promotur economic Niculin Meyer.