L’energia electrica digl avegnir

Da Hans Huonder / anr

Senza energia electrica va praticamein nuot pli. La damonda ei mo, co vegn quella producida egl avegnir en ina moda persistenta. Avon struschamein otg onns ha la gronda catastrofa cun in’ovra atomara a Fukushima el Giapun procurau per in niev patertgar en connex cun la producziun d’energia electrica. Pliras tiaras – denter quellas era la Svizra – han decidiu da sortir dalla producziun d’energia electrica cun agid d’ovras atomaras. Pli e pli sut squetsch vegn denton era la producziun d’energia cun agid da materia fossila, surtut en connex cun la midada dil clima. La gronda damonda che setschenta cun quella midada da strategia ei co il diever d’energia futur duei vegnir cuvretgs. La perscrutaziun lavura vid novs models e vid soluziuns pigl avegnir. Per la quarta ga porschan ils «discuors davart la perscrutaziun dall’energia» a Mustér la plattafuorma pil scomi da savida ed experientschas sin quei sectur. Els han liug duront plirs dis la fin da schaner. El center stattan referats e luvratoris che sefatschentan da temas che plidentan buca mo ils perscrutaders, mobein era glieud dalla politica, dallas administraziuns publicas e surtut dalla pratica. Danovamein vegnan quels dis cumbinai cun in arranschament public cun plirs referats ed ina discussiun al podi.

Pagina 3