Tgi vegn a menar la residenza sper il spital?

dad augustin beeli / anr

Dapi siat onns ei l’interpresa Nocasa vidlunder da projectar a Glion ina surbaghegiada gronda sper il spital regiunal. Ils plans digl architect Conradin Clavuot ein semtgai dapi quater onns. Ussa maunca aunc in contract da servitud cul spital. Igl atun vargau ha ei pariu ch’il project mondi ella fasa da realisaziun e che las maschinas entscheivien gleiti a cavar il foss. Per quei project drova ei veramein in grond e profund fundament. Cu la surbaghegiada vegn ad esser finida vegn il center da seniors e da sanadad a s’udir denter las casas pli aultas da Glion. 60 habitaziuns sin 12 alzadas baghegia l’interpresa Nocasa ella spunda davos la claustra veglia dallas soras dominicanas da Glion. Per saver far quei ha la vischnaunca Ilanz/Glion stuiu decretar ina procedura per ina zona nova da spital. Quella ha evocau ni protestas ni reclamaziuns.

Scamond d’access

La stad vargada, duront la procedura per la lubientscha da baghegiar, ha ei denton dau opposiziun. Ei mondi per caussas formalas e detagls, ha il meinaproject Flurin Candinas declarau avon dus meins all’anr. Lur project seigi semplamein in ton pli cumplex ch’ina casa d’ina famiglia, igl interess per affittar habitaziuns e localitads seigi perinagada cheu, haveva el aschuntau. Co eis ei ussa cullas protestas e recuors encunter il project? La populaziun sedamonda sche l’interpresa Nocasa vegli veramein realisar quella gronda surbaghegiada ed investar persuenter 30 milliuns francs. «Nus essan ussa siat onns vidlunder, e nus lein baghegiar», conceda il meinaproject Candinas sin damonda dall’anr. In dils opponents dil project ei il cussegl d’administraziun dil Spital regiunal Surselva. Il president da quel, Mathias Bundi, confirma all’anr ch’ins seigi vidlunder da reglar ils detagls cun in contract da servitud. «Quei contract ei sin via», declara el. Il spital cun parcella cunfinonta sappi buca criticar la planisaziun locala vertenta cun ina zona da spital.

Ei seigi ussa d’insister sils detagls, declara Bundi. In punct critic fuva la colligiaziun directa denter residenza e spital. La passarella denter la residenza cun sias 60 habitaziuns ed il spital fuss stada previda per saver trer a nez mintga gi certs survetschs. Las normas da discreziun dil spital lubeschan denton buc ina libra circulaziun ed access permanent alla terrassa ed agl ambulatori dil spital. Bundi confirma quei. Sco el gi eis ei in dils puncts dallas contractivas. Ch’il helicopter dalla Rega vegness a setschentar egl avegnir sil tetg dalla residenza resta en scadin cass ina cumpart impurtonta dil project. La colligiaziun per menar ils pazients dil tetg dalla residenza tochen el spital e viceversa ei medemamein garantida.

Alla tscherca d’in meinagestiun

Tut ils detagls denter Nocasa e spital regiunal ein denton aunc nuota defini. La projectadra Nocasa ha stuiu far concessiuns enviers las pretensiuns dil spital. Pertuccont il plaz da setschentar dalla Rega – quel transporta da tuttas uras pazients – sto Nocasa metter a disposiziun in plaz da reserva duront la fasa da baghegiar. Candinas gi ch’ins seigi en discuors culla Rega pertuccont quei punct. Per saver contrahar claramein e transparent giavischa il cussegl d’administraziun dil Spital regiunal Surselva da Nocasa plinavon che Nocasa regleschi in ulteriur punct. «Nus stuein haver in partenari che surpren la responsabladad», declara Bundi. El conceda ch’il spital vegli e sappi buc impedir il project d’in’interpresa privata, tonpli ch’ins hagi decidiu las formalitads zonalas.

Per saver fixar il contract da servitud drovi ei aunc ina persuna responsabla per la residenza. Bundi manegia ch’il projectader stoppi engaschar in meinagestiun responsabel pigl entir cumplex che Nocasa baghegia. «Nus essan sin buna via da reglar quei punct», avisescha Candinas. El confirma ch’ins seigi en contact cun ina persuna interessada da surprender il post da meinagestiun dalla residenza s. Giusep. Cu ins sa dar l’emprema badelada al project digl architect Conradin Clavuot sa el buca gir. Candinas quenta buca ch’ei cuozi aunc ina gada siat onns. Sper las contractivas culs organs dil spital regiunal ha Nocasa daferton aunc da reglar detagls d’infrastructura culla vischnaunca Ilanz/Glion.