As preparar per l’avegnir

(anr/afi) Il cussagl da la Fundaziun Nairs ha approvà la dumonda per üna co-direcziun. Il Center d’art contemporana in vicinanza da Scuol vain manà a partir da quist on da Christof Rösch e da Sarah Fehr. Christof Rösch es daspö 20 ons directur e manader d’art da la Fundaziun Nairs a Scuol. Sün si’iniziativa ha approvà il cussagl da la fundaziun la dumonda d’üna co-direcziun ed ha elet a Sarah Fehr in quista posiziun. Ella es daspö l’on 2017 respunsabla per la comunicaziun, pel fundraising e pel program «Artists-in-Residence». Sco co-directura surpiglia ella, sper sias incumbenzas üsitadas, la direcziun commerciala.

Üna gestiun da tuot on

Da l’on 2005 es gnüda constituida la Fundaziun Nairs e l’on passà s’haja pudü festagiar il giubileum da 30 ons Chasa d’artists. Minch’on selecziunescha üna giuria 30 artistas ed artists e tils invida per ün sogiuorn illas localitats dal center a Nairs. Illa halla d’art dal Center d’art contemporana organiseschan ils respunsabels da la Fundaziun Nairs in l’anteriura Chasa da bogns sün trais etaschas exposiziuns e referats da tuot gener. E sco center da cultura s’occupan els culla cultura e la creaziun culturala illa regiun. Quist stabilimaint es üna da las differentas parts dal cumplex Nairs. Sper la Chasa da bogns as rechattan qua amo ün hotel e las differentas büvettas. Daspö la renovaziun e la reavertüra da la Chasa d’artists da l’on 2016 vegn la gestiun dal center d’art manada l’inter on. L’intent es da sviluppar inavant la gestiun i’l sectur strategic e lapro tocca eir d’intensivar ils contacts culs partenaris naziunals ed internaziunals. Cun quai conferma la fundaziun la via inchaminada i’l passà: Ils progets introdüts a reguard la cultura da fabrica e per la promoziun dal rumantsch vegnan manats inavant ed al medem mumaint as lavura vi dals contacts internaziunals.

Sensibilisaziun per 
l’art contemporana

«Il giavüsch per üna co-direcziun vaiva eu fingià plü lönch«, declera Rösch. El s’algorda da quel temp cur ch’el ha surtut la gestiun dal Center d’art contemporana Nairs. «Cumanzà n’haja cun üna simpla maschina da scriver, meis büro nu d’eira uschè grond ed eu d’eira sulet respunsabel pels artists.» El es daspö l’on 1999 directur e manader d’art da la Chasa d’artists e daspö l’on 2005 maina’l la Fundaziun Nairs. Cun l’ir dals ons s’ha sviluppada la gestiun e, tenor Rösch, es uossa qua il temp per daplü professiunalità. Müdada nu s’ha be l’infrastructura da la Fundaziun Nairs. Creschü es tanter oter eir il büdschet. «Plü bod vaivan nus ün büdschet da 120 000 fin 150 000 francs, hoz faina quint cun bundant ün mez milliun», declera il co-directur chi ha survgni da l’on 2017 il Premi d’arcugnuschentscha dal chantun Grischun. I’ls ultims ons s’haja, sco cha Rösch manzuna, pudü sensibilisar il public per l’art contemporana. El es da l’avis cha l’Engiadina Bassa saja ün bun lö per l’art. «Quai demuossa eir la sporta da Not Vital cun seis chastè a Tarasp o il Muzeum Susch chi ha drivi d’incuort sias portas.» Per spordscher in avegnir la qualità chi s’ha ragiunt dürant ils ultims ons a Nairs «faja simplamaing dabsögn da structuras chi sun independentas e na colliadas a persunas». Rösch abita e lavura a Sent.

«Üna decisiun logica»

«La decisiun dal cussagl da fundaziun da manar la gestiun a partir da quist on cun üna co-direcziun es üna decisiun logica», manzunan ils respunsabels da la Fundaziun Nairs. Hans-Jörg Heusser, il president da la fundaziun, es da l’avis cha Rösch e Fehr as cumpletteschan bain, quai eir pervi da lur differentas experienzas e cumpetenzas. Fehr es graficra, comunicatura e managera da cultura. A la Scoul’ota per scienzas da mediums applichats a Turich ha’la stübgià comunicaziun e schurnalissem. Actualmaing fa ella ün master per management da cultura a l’Università da musica ed art figürativa a Vienna. Fehr abita a Ramosch ed a Winterthur.