«Biviolino» ò en nov datgesa

DA GION NUTEGN STGIER / ANR

Sen l’antschatta dalla staschung d’anviern 2018/19 ò igl «Biviolino», la canorta per unfants dalla Scola da skis Beiva, mido localitad. Mano vign igl «Kids Club» dad Irina Merfeld-Thomann. Sonda passada è sto de dallas portas avertas. Igl «Biviolino» è a Beiva ple u manc chegl tgi igl «Pinocchio» è a Savognin. An tots dus lis turistics èn las dus purscheidas per unfants en supplemaint dallas scolas da skis tgi vign stimo fitg cunzont digls giasts. Cun blera amour, bler chito e gronda pazienztga vardan donnas bagn digls unfants, dattan tgira ad els e pussibiliteschan uscheia agls genitours digls unfants dad eir cun skis u far schiglio en bel de. Gist chegl fò cun bler angaschamaint er Irina Merfeld-Thomann, la donna da Parsonz tgi magna da nov igl «Biviolino Kids Club» a Beiva. Da nov è chel sot tetg aint igl local digl anteriour Volg, detg oter, betg gliunsch davent digl runal Camon u gist visavi agl hotel Post.

Irina Merfeld-Thomann, ella dei d’aveir scumanzo cun plascheir la sia lavour aint igl «Biviolino Kids Club». La direcziun dalla Scola da skis Beiva lascha blera libertad, uscheia tgi ella possa manar la canorta ple u manc tenor la sia ideia, dei la sociologa e pedagoga sociala. Graztga a chellas professiuns ò la manadra digl «Biviolino» sa tgapescha premissas idealas per manar en tal travagl noua tgi igls unfants èn igls protagonists. I seia fitg bel, interessant ed er ampernevel da tgirar igls unfants e da metter els aint igl center, menziunescha Merfeld-Thomann.

Antschet bagn la staschung

La partenza dalla staschung 2018/19 seia naturalmaintg stada perfetga, manegia la donna da Parsonz tgi ò cun la sia famiglia dimora a Beiva aglmanc per chest anviern. Per de vegia ella tgiro anfignen otg unfants ed er daples. Tot tenor domber d’unfants meida la manadra digl «Biviolino Kids Club» er igl program digl de ed adattescha chel er allas abilitads digls unfants tranter dus e 12 onns. I vegia sa musso tgi la canorta seia cunzont er giavischeida per unfants da dus anfignen quatter onns, dei Merfeld-Thomann. Durant igl de vign zambergea, fatg gis, durmia, canto e chegl an ena legreia. Igl «Biviolino» è andrizzo ampernevel, igl local è cler ed igl spazi è grond, uscheia tgi igls unfants pon er saltar anturn cun aveir abundanza plaz. A disposiziun stattan er blers tarmagls, chegl tgi totga tar en «Kids Club».

Avert glindesde anfignen venderde

La purscheida digl «Biviolino» è fitg vasta ed igls prietschs per la tgira sa drezzan tenor igl taimp tgi igls unfants passaintan aint igl «Kids Club». Menziunar ins dastga er tgi igls prietschs, seia chegl per en mez de u per en antier de, èn modests. La mesemda per exaimpel on genitours er la pussebladad da dar giu lour unfants dallas 18.30 anfignen allas 22.00 aint igl «Biviolino» noua tgi dat alloura er per mintgign ena pizza. Er igl venderde seira è chegl pussebel, pero sainza tgi dat pizza. Igls taimps d’avertura uffizials èn dallas 09.00 anfignen allas 12.00 e dallas 14.00 anfignen allas 17.00. Sur mezde è pero er pussebel da lascher igls unfants aint igl «Kids Club».

Infurmaziuns ins survign per internet sot l’adressa: www.schneesportbivio.ch u per telefon 081 684 53 90.