«Ensemen» – Gruppa da lavur 
per giuvenils

(anr/gc) La gruppa «ensemen», fundada 2010, vegn menada dad Edith Messer-Jörg. Ella ei catecheta ed en possess d’in diplom sco mussadra per lavur ecclesiastica cun la giuventetgna. Naschida e carschida si eis ella a Domat, habitescha a Flem, maridada e mumma da dus affons carschi. Sustenida vegn ella mintgamai dils plevons sur Gregor Barmet, Domat, sur Bronislaw Krawiec, Falera e Laax e sur Andreas Rizzo, Panaduz e Razén.

Las finamiras

Intermediar las valurs fundamentalas dalla cardientscha catolica; promover activamein il brat da meinis; dar sustegn individual, social e societar; viver da cuminonza e tenor la cardientscha sco era far giugs, spass e fun e nuar novs contacts.

Organisai vegnan 
divers camps

Igl emprem camp d’Anceinza ha giu liug 2011 a Flond – sco in’occurrenza religiusa. Lu ha ei era dau camps d’evenimentar sill’alp da Stierva sco weekends per tancar forza, inagada per famiglias ed era per tuts. Mintga treis onns serenda la gruppa «ensemen» a Roma (scalem superiur). Il proxim viadi el marcau etern ha liug 2020. Offeriu vegn quei tut mintgamai per scolars da diversas classas – naven dalla 4.–6. e l’emprema dil scalem superiur.

Els camps alla fin dall’jamna stat la cuminonza el center – mo era Jesus. Perquei vegn fatg survetschs divins adattai per la giuventetgna nua ch’ins sa era separticipar activamein. Duront ils camps vegn luvrau savens vid in tema, fatg giugs el liber e zambergiau. Dad «ensemen» vegnan tuts risguardai ed ein beinvegni. Mintgin sa contribuir tenor habilitads. Tier las biaras purschidas han era gidonters e gidontras la pusseivladad da cooperar. Era vegn empriu da tgamunar tras funcziuns praticas. Els cuors per giuvens menaders vegn risguardau la pratica ed approfundiu ella teoria.

Program per 2019

Il camp d’Anceinza ha liug dils 29 da matg tochen igl 1. da zercladur a Traun/Trans (5. e 6. classa). – Dils 5–9 d’uost vegn passentau sill’alp da Stierva (3. e 4. classa); ils 30 d’uost tochen igl 1. da settember ei sentupada per tuts – affons e carschi – a Mustér. Alla fin da settember ha in weekend per la giuventetgna liug a Milaun (scalem superiur).