In niev scop per la remisa dalla viafier a Glion?

dad augustin beeli / anr

La Viafier retica ei vidlunder da transformar cumpletamein igl areal dalla staziun a Glion. Tenor la populaziun e las autoritads, mo era la direcziun dalla viafier sezza eis ei stau neras uras. Ussa sto aunc in davos relict dil vargau untgir. La remisa da rauba. Forsa vegn ella reconstruida en in auter liug. Igl areal dalla staziun a Glion ei dapi treis onns in plazzal da baghegiar. Entschiet las preparativas per transformar quella en ina staziun moderna ed adattada al temps ha la Viafier retica cun scarpar giu il Rheinhof. Quei bein puril haveva la viafier construiu en connex cull’avertura dalla lingia Rehanau–Glion. La spazzada dil Rheinhof, situaus denter il Rein ed ils binaris, ha buc evocau critica e la populaziun ha strusch priu notizia da quei. L’immobilia fuva en possess dalla Viafier retica, ella ha construiu quei edifeci ed era puspei spazzau el varga 100 onns pli tard. Igl areal ha l’interpresa duvrau per slargar binaris e baghegiar la remisa dil caulingia.

«Nova» remisa gastronomica

Il niev baghetg dil caulingia e da sia gruppa dils crampers ei dapi varga in onn en funcziun ed era il sutpassadi denter il Center Marcau ed igl areal alla riva dil Rein ei finius. Il caulingia ha bardigliau naven dalla remisa veglia da tschella vart dils binaris. Lezza remisa ei dapi 1903 en funcziun. Ella ha surviu duront pli che 100 onns a siu scop. Leu han ins magasinau rauba, recepiu silla rampa palets ni spediu naven da Glion da tuttas sorts rauba. La remisa ei ina construcziun da travs, baghegiada tenor las normas dall’epoca da piunier dalla viafier. Ils architects havevan malegiau ils plans, quels daventavan standard per las biaras staziuns. La remisas han ins schau ereger meister-lennaris. Sin tuttas lingias entupav’ins baghetgs el stil da chalets svizzers cun tetgs lads. Oz ein las remisas danvonz, pertgei in menaschi modern funcziuna cumpletamein auter. En differents loghens ha la Viafier retica dau giu il terren inclus edifecis vegls. A Tavau han ins scarpau giu la remisa e baghegiau leu ina casa da persunal pils hotels. A Claustra survescha la remisa alla «Kulturgesellschaft Klosters». Quella organisescha leu differentas occurrenzas, kino, jazz, teaters, referats ed auter. Era ad Arosa duvrava la viafier buca pli sia remisa baghegiada entuorn il 1914. Dapi in onn survescha quei baghetg liung e stendiu sco ustria. Quei ch’ins duvrava pli baul pil menaschi ei oz in’ustria «hip-coola» sper la staziun d’Arosa. Grondas finiastras, divertiment musical, sutgas cumadeivlas ed ina meisa da diesch meters envidan ils turists da tuttas stagiuns. La rampa nua ch’ins scargava e cargava la rauba ei ina terrassa.

Exempel remisa da Malans

Ad Arosa ha la viafier sezza realisau la transformaziun e confidau il menaschi gastronomic ad in ustier. A Malans dat ei in’ulteriura transformaziun d’ina remisa da viafier. Leu havevan ils tiradurs endrizzau en quella in local da sittar cun caliber pign sin 10 meters. Quei ha denton custau pulits sforzs. Igl atun 2012 han ins stuiu spazzar la remisa. La construcziun dil sutpassadi dil tren cun via nova encunter il vitg da Malans ha sfurzau d’allontanar il baghetg. Ils tiradurs havevan denton retschiert la garanzia ch’els sappien puspei retrer lur domicil. Ins ha pia spazzau la remisa e reconstruiu ella, suenter ch’il sutpassadi fuva finius, el medem liug. Ils tiradurs sportivs da Malans ein s’engaschai fetg cun lavur cumina per lur local. Actualmein slarga la Viafier retica a Glion ils binaris. Cu quella fasa ei finida vegn la staziun spazzada e cun ella era la remisa da rauba. Sco quei ch’ins auda a Glion eis ei aunc buca clar sche la remisa sto veramein untgir. Ins auda che la Protecziun dalla patria dil Grischun hagi inoltrau protesta. «Na, quei constat buc. Nus essan buc involvai en quella caussa», refusa Ludmilla Seifert, la meinagestiun dalla Protecziun dalla patria dil Grischun. Sco ella gi eis ella era buc informada dapli da quella caussa. Eis ei pusseivel che la remisa a Glion vegn forsa era spazzada e reconstruida – tenor igl exempel da Malans? Quei muntass ch’ina uniun ni organisaziun havess dumandau d’astgar surprender il baghetg. L’anr ha vuliu saver dalla direcziun dalla Viafier retica sch’ella fetschi amogna la remisa ad interessents ni co ins vegli proceder. Il responsabel dalla direcziun ha deplorablamein aunc buca giu peda da rispunder la damonda. L’anr revegn perquei puspei alla tematica e rapporta surlunder.