Tgi vegn niev uestg da Cuera?

da martin Cabalzar

Da Pastgas 2019 scada igl episcopat digl uestg actual Vitus Huonder (77) ch’ha cuzzau 10 onns definitivamein. Gia avon dus onns haveva el – tenor dretg vertent – giu inoltrau sia demissiun. Il papa ha denton giavischau ch’el resti dus ulteriurs onns en uffeci, ed igl uestg ha fatg obedientscha. Aschia han ins giu dus onns peda da preparar l’elecziun da siu successur. Quellas preparativas ein denton apparentamein fatgas en tutta confidenzialitad e tscheladadad, aschia che negins indezis ein penetrai ella publicitad. Era igl ordinariat episcopal fa la gatta morta. Cuntrari ad auters uestgius ha igl uestgiu da Cuera il privilegi da saver eleger sez siu cau diocesan. Quella libertad ei denton limitada pulitamein, il capetel catedral che cumpeglia 24 canonis ha sulettamein la letga d’eleger denter treis candidats che vegnan proponi dalla sontga sedia a Ruma. Il davos plaid ha la finala tuttina il papa. Senza sia confirma sa in uestg buca surprender igl uffeci episcopal. En cerchels ecclesiastics curseschan dapi entgin temps differents nums da papabels. Ils favorists dalla ala conservativa ein: il vicari general Martin Grichting, il vicari general Andreas Fuchs, igl uestg auxiliar da Cuera Marian Eleganti, igl uestg auxiliar da Friburg Alain de Raemy ed il plevon Roland Graf. En l’ala liberala circuleschan ils nums dils avats da Nossadunnaun Urban Federer e Martin Werlen sco era igl anteriur vicari general Andreas Rellstab. Tiels papabels tucca era in Romontsch, numnadamein igl anteriur minister general dils caputschins Mauro Jöhri da Beiva. Siu handicap: sia vegliadetgna avanzada.

commentari e pagina 3