Creau il spazi per in spass infinit

(anr/ac) Il giug da teater «Il spass infinit» tenor in roman da David Forster Wallace ha giu premiera avon in onn a Berlin ed ei sepresentaus la fin dall’jamna a Turitg el Schiffsbau. In’inscenaziun cun participaziun grischuna buca sulet entras la giugadura Ursina Lardi. Per il maletg da tribuna han ils architects sursilvans Gordian Blumenthal e Ramun Capaul procurau. In mir da plattas da fier e nuot auter fuorma il maletg da tribuna dil toc inscenaus dil regissur tudestg Thorsten Lensing. El ei sededicaus ad in roman voluminus digl autur american David Forster Wallace ed ha elavurau in’adattaziun per la tribuna. E gest per quell’adattaziun teatrala ha il biro d’architectura da Glion Capaul/Blumenthal contribuiu il maletg da tribuna. E co vegnan dus architects sursilvans en contact cun la scena da teater tudestga ed in’inscenaziun a Berlin? Entras contacts privats, sco quei che Gordian Blumenthal ha explicau. Numnadamein via l’actura grischuna Ursina Lardi, la partenaria dil regissur Thorsten Lensing. Ed aschia ei la damonda setschentada a Glion schebein ils architects fussien promts da sefatschentar cun il maletg da tribuna dil toc che porta il medem tetel sco la versiun tudestga dil roman da Wallace: «Der unendliche Spass». Blumenthal ha tschintschau dad in’interessanta incarica ch’hagi menau el pliras gadas a Berlin. Leu eis el sefatschentaus all’entschatta cun il text da teater elavuraus dil regissur. Ella collaboraziun cun Lensing e la lectura communabla dil text ei l’idea dil mir naschida. Plattas da fier criu elavuradas en ina cularia tudestga e nuot auter fuorman il maletg dalla tribuna. Ina revista tudestga scriva che la tribuna da Blumenthal e Capaul seigi svidada cumplet, in mir buca ligiaus giu spartgi il spazi dalla tribuna en duas parts. Forsa in simbol per quella ni tschella vart dil mund?

Il giug ed ils acturs en il center

Igl architect sursilvan ha explicau la pretensiun dil regissur ch’il giug ed ils giugadurs stoppien star el center ed astgien buc esser impedi davart dil maletg dalla tribuna. Quella finamira ademplescha la lavur dils dus architects grischuns en mintga cass.

Plinavon porscha il mir dabia spazi d’interpretaziun davart dalla historia tudestga ni viers las discussiuns actualas en ils Stadis Uni. Blumenthal ha tschintschau dad in’interessanta incumbensa e da contacts captivonts cun la scena da teater a Berlin. El ha getg ch’ei seigi stau ordvart tensiv da puder persequitar co regissur ed acturs elavurien in toc da teater. Pliras gadas ei Blumenthals serendius a Berlin e diversas gadas ha el persequitau las presentaziuns, sco la davosa fin dall’jamna il giug sin la tribuna 
dil Schiffsbau dil Teater dil marcau da Turitg.

In’inscenaziun cun participaziun dall’actura grischuna Ursina Lardi e denter auter digl enconuschent actur tudestg Devid Striesow, enconuschents als adherents dall’emissiun da crimi Tatort en sia rolla da cumissari. Igl ei quei ensemble da giugaduras e giugadurs che dattan al toc la tempra e presentan in ault art dil giug dad acturas ed acturs. Il regissur pretenda enzatgei dil publicum cun presentar in text cumprimiu sur quater uras che suonda la filosofia da scriver digl autur american. Numnadamein da buca suandar in agir direct e linear, mobein da cavigliar plirs centers d’acziun in en l’auter. Sche la varianta che Lensing ha elavurau per la tribuna po satisfar all’intenziun dil scribent pon tals valetar ch’han legiu l’ovra voluminusa da David Forster Wallace.

L’inscenaziun sco tala brigliescha adina puspei cun inspiraziuns originalas, denton para auter ch’ins vesa el «Spass infinit» enzaco enconuschent, gia vesiu. Magari gira era il teater modern contemporan empau en rudi.