Fitg bung, ma betg scu digls miglers onns

(pb) Ins scheva eneda tgi igl travagl sur las Festas seia per igls lis turistics prest ena terza digl antier anviern. Gl’è alloura do onns sainza neiv ed er frequenzas mairas. Chest onn erigl puspe bel anviern e per part er bel’ora. Ins è turno puspe tar las relaziuns digls miglers onns? Na, glez betg gist. Las frequenzas digls miglers onns ègl betg sto gl’onn passo cun bunas relaziuns da neiv ed ègl er betg sto chest onn. Ma chest onn ins sainta an general ple u manc angal a ludar igl travagl sur Nadal e Bumang. Ed alloura cumparagleschan tscherts purtaders turistics cun avant en pêr onns da schletas relaziuns da neiv. Alloura è Nadal/Bumang sto super! E schi ins cumparaglescha cun igls miglers onns ins è er cuntaint, ma chellas frequenzas ins vign strousch a contanscher ple. Chegl ò er da far en tant cun igl sa cuntigneir digl giast. I dat anc adegna chel giast tgi stema durant chels deis sur las Festas dad eir ainten l’aria frestga a galdeir las spondas cun neiv nova sen igl territori da skis. Ma i dat strousch ple chel giast tgi vign per eir mintga de sen pista. Ed alloura dattigl er chel giast tgi vot eir aint igl tgod e galdeir la mar ed igl suglegl. Chellas vacanzas vignan oz offereidas per prietschs relativamaintg favorevels. An mintga cass betg pi tgers tgi vacanzas da skis. E gl’è sa musso eneda daple tgi chels giasts tgi vignan tar nous èn an amprema lengia igls giasts stabels. Principalmaintg chels tgi on tgesas u abitaziuns da vacanzas ed alloura chels giasts tgi turnan regularmaintg ainten igls madems hotels. Chels èn pi numerous a Planeiras tgi p. ex. a Barvogn, Savognin u Beiva. Tigls giasts digls hotels totgan er chels tgi decidan spontanamaintg tge sort da vacanzas tgi els lessan far e chegl è er fermamaintg dependent dall’ora. Ensatge tgi ins stò er risguardar tar igl travagl sur las Festas è mintgamai la constellaziun digls firos. Chest onn è chella stada optimala uscheia tgi igls ampluias on strousch gia dad unfreir deis da vacanzas.

Daple gliout sen las pistas

Siva chesta resumaziun generala dallas frequenzas turisticas sur las Festas lessans tuttegna tschartger da diversifitgier en tant. Chegl vot er deir da vurdar per exaimpel scu tgi gl’è sto sen igls territoris da skis. Igl tenor tras tot igls territoris da skis da Surmeir: Massa gliout sen las pistas. Perfign da spitgier. Betg dei, ma ins era betg ple diso da spitgier! Er cò è da remartger tgi las frequenzas digls miglers onns niron strousch ple cuntanscheidas. Scu menziuno è igl sa cuntigneir digl giast sa mido e vetiers èn sa redutgias ferm igls davos diesch onns igls letgs tgods tgi stattan a disposiziun. Chegl digls letgs tgods vala pi pac per la destinaziun da Planeiras.

Uscheia valigl er da cumparagler las frequenzas sen la pistas cun igls davos diesch onns. Tenor indicaziuns dall’Organisaziun grischuna dallas pendicularas ins ò registro sur igl antier cantun las frequenzas sur las Festas cun en plus da 5,5%. Chegl èn 8,6% daple tgi la media digls davos tschintg onns e 0,6% daple tgi la media digls davos diesch onns.

Schi vurdagn la regiun digl Grischun central incl. Arosa e Planeiras, alloura sa preschainta la situaziun anc miglra: En plus da 6,2% anvers igl onn passo, 18,9% daple tgi la media digls davos tschintg onns e 4,5% daple tgi la media digls davos 10 onns.

Ossa ègl grev da deir schi chegl è ena tendenza u schi gl’è ena consequenza dallas circumstanzas favorevlas cun las bunas relaziuns da neiv e dall’ora e dalla constellaziun digls firos.

Bung e fitg bung!

Tar igls oters menaschis tgi èn pi ferm u pi pac ferm dependents digl turissem dattigl an chel senn betg gio cefras concretas. Igls hotels èn an general fitg cuntaints e discorran da: Betg en sulet letg veid, ple u manc tot igl taimp plagn u fitg bunas frequenzas. An mintga cass tot attributs tgi mossan tgi ins è cuntaint. Er igls travagls gastronomics ainten la regiun discorran da «strousch ena meisa libra» e chegl davent da locals cun ena cuschigna pi simpla anfignen tar igls locals da gourmet. Ed ins è er cuntaint cun la tenuta digl giast anvers las consumaziuns. El è er a cò pitost puspe pront da lascher correr igls daners. Ena tendenza tgi è cuntinuada scu gio igls davos onns è tgi la gliout stat la seira betg schi dei ainten igls locals gastronomics. Siva dallas diesch ègl igl solit gio svido. Chegl meida en tant tar igls restorants digls hotels noua tgi ins è gio ainten tgesa.

Chels giasts ed indigens tgi vottan prolungar la seira e sa cattan an buna cumpagneia er anc dad ouras pi tardeivas, igls ezs sa cattan an general ainten locals tgi èn previas persiva.

Las abitaziuns da vacanzas èn tenor indicaziuns digls biros turistics er stadas dumandadas ed er occupadas fitg ferm.

Ed alla finala anc igls affars ainten las destinaziuns turisticas da Surmeir. S’accurschia fitg ferm las bunas frequenzas on an amprema lengia igls affars da sport. «Scu gio dadei betg ple» decleran els la situaziun.

Per tot igls oters affars scu buteias da victualias, drogarias, apotecas, furnareias, mazlareias etc. èn las frequenzas er stadas fitg bungas, chegl tgi ins ò constato ve digl stgamgiamaint.

Chegl tgi ins stò er remartger an chel li è tgi cun igl pi tard igls 6 da schaner è la regiun turistica sa svidada an en colp ed ossa rigia puspe «normalitad».