Marcel Tobler â defendieu sia dominànza

(anr/bt) L’Uniùn svizra digl sport da tgàns da schlieusas â salvo la sia amprema cursa da la staschùn la fegn d’eanda a Spleia. Paladers da sis naziùns ân cumbatieu par la victorgia an 15 categoreias. Marcel Tobler da Ziràn â gudagnieu la categoreia digl sprint cun dus tgàns, dafartànt ca Rayk Neumüller da Ziràn e davanto quart. Igls 103 paladers en vagnieus tratgs da radund 300 tgàns sur igl tschancùn da otg antoca 13 kilometers. Trànter quels e’gl sto 74 Svizers, 18 Talians, sis Franzos, dus Tudestgs, dus Hollandes ad egn digl Liechtenstein. Partizipànts grischùns e’gl me sto dus: Marcel Tobler a Rayk Neumüller, amadus da Ziràn. Sco igl on passo a Tobler ear uon domino la cursa an la categoreia sprint, cumbagn me cun egn avantatg da 0,4 secundas sen sieus concurent franzos. Tobler pala egna manadira da dus tgàns: Egn e digl raz Alaskan Malamute a tschel egn Grönlandes. «Quels dus tgàns ân gudagnieu gea blearas cursas. Mo plànet vignani vigls, ad igl cuza betga ple gitg c’els en bùns da dumignear cursas», palainta Tobler. El fa part da tutas cursas svizras da tgàns da schlieusas. Evidaint c’el investescha blear tains par que sport. «D’unviern essan prest mintga fegn d’eanda da vieadi par partizipar d’egna cursa near d’anqual trenamaint», aschunta Tobler c’e vagnieu an contact cun tgàns da schlieusas an Scandinavia. «Egn’eada, cur ca jou a mia duna vagn passanto las vacànzas an Norvegia, e vagnida svaglieada la mia faszinaziùn par tgàns da schlieusas, fagiànd egn vieadi turistic cun tgàns da schlieusa.» Ad ussa po’l cumbinar la sia preferenza par tgàns cugl sport. El e davanto musher. Mushers vignan numnos igls paladers da tgàns da schlieusas, a «mush» munta an que conex «travatschar tras la nev».

A caschùn da la cursa da Spleia en igls passa 100 guids da tgàns partieus an 15 categoreias. Las prinzipalas en igl kjöring cun skis (quegl munta egn tgànt tira egn passlunghist), igl pulka (quegl e egna schlieusa da la furma da bartgeta) a las manadiras dad 8, 6, 4 ni 2 tgàns. Las diferaintas categoreias ân da parcurer tschancùns da diferainta lungheztga: Igls passlùnghists a las manadiras gràndas fan 13 km a las manadiras pintgas otg km.

Igl dat strusch egn sport ca sveglia tàntas emoziùns tànt tigls cursists, tigls aspectaturs sco ear tigls tgàns ca giapan, urlan a saglian digl plascher avànt la cursa. «Dantànt cugl giapem sfrano damussi la motivaziùn da l’antiera squadra da partir», declara igl verso plidader digl gi Stephan Kaufmann. «Quegl e la natira da quels tgàns c’en vagnieus tratgs par trer.» Que sport vala alura tigls tgignots ear sco expressiùn d’energeia, natira a libertad. «Igl suczess da cursa dependa da la harmoneia trànter tgàn a tgignot.» Quel pala la sia manadira me cun clamar: Igls tgàns ston alura saver midar direcziùn near guntgir impedimaints. Corespundaintameing impurtànts en la bùna tgira digls tgàns ad igl intensiv trenamaint ca ca garantescha la parfetga comunicaziùn trànter tgàn a patrùn. Quegl ân igls aspectaturs pudieu giuder a caschùn da la cursa da Spleia, sper observar las diferenzas trànter igls sis razs da tgàns da schlieuses.