«Nagina gronda surpraisa»

DA GION NUTEGN STGIER / ANR

Cun Jon Pult è sin la glista da la ps ina vaira «locomotiva» dasper las ulteriuras quatter persunas. El sez candidescha per il cussegl naziunal ed er per il cussegl dals chantuns. Sia candidatura na saja nagina surpraisa, vegni ditg davart da la pcd e per la pld è sia candidatura in’impertinenza. Ier ha la ps grischuna preschentà a la publicitad ils candidats e las candidatas per las elecziuns naziunalas ch’han lieu en diesch mais. La finamira saja da defender il sez da cussegliera naziunala Silva Semadeni che renunzia ad in’ulteriura candidatura. Quai ha ditg ier Lukas Horrer, il secretari da la ps e manader dal cumbat electoral. Cun Jon Pult, l’um da 34 onns, ha la ps alur a la testa da la glista ina persunalitad ch’ha fatg fin uss ina carriera politica admirabla, saja quai sin champ chantunal ed er naziunal. Senza dubi è el quel che duai procurar che la ps grischuna è er suenter las elecziuns naziunalas 2019 vinavant represchentada a Berna en la chombra pitschna.

Trais dunnas

Dasper il «shooting star» Pult figureschian gist trais dunnas sin la glista da la ps grischuna. Quai èn Sandra Locher Benguerel, ella che vegn cunzunt a far vuschs a Cuira. Las duas ulteriuras dunnas èn Franziska Preisig, la deputada engiadinaisa, e la deputada Erika Cahenzli-Philipp da Vaz sut. Il segund um sin la glista è Philipp Wilhelm, il president actual da la ps grischuna e deputà da Tavau. Da defender in sez da cussegliera naziunala Semadeni saja per la ps grischuna ina vaira sfida che sa chapeschia cunzunt na per sasez, ha punctuà Horrer.

16 onns activ en la politica

Cun la candidatura dubla da Pult, saja quai per il cussegl naziunal e per il cussegl dals chantuns, avain nus in novum en il Grischun. Cun la candidatura dubla da l’anteriur president da la ps chantunala duai il suveran grischun avair ina schelta er tar las elecziuns per la chombra pitschna. «I dovra in’alternativa tar ils ulteriurs candidats per il cussegl dals chantuns», ha menziunà Pult. El è gia dapi 16 onns activ en la politica, stà set onns en il cussegl communal da la citad da Cuira, tants onns president da la ps grischuna ed er otg onns deputà.

«In animal politic»

La candidatura dubla da Pult na saja nagina gronda surpraisa, ha ditg Stefan Engler, il president da la pcd grischuna e sez candidat per ina reelecziun en la chombra pitschna a Berna. En la democrazia exista strusch in dretg da vegnir elegì. La democrazia saja ina furma statala da la concurrenza politica, ha ditg Engler. La candidatura da Pult haja er la pcd da prender seriusa cun esser Pult in vair «animal politic». El candideschia cunter sia persuna e cunter Martin Schmid, ha menziunà Engler. El è er da l’avis che tant tar el sco er tar Schmid saja tuttina avant maun ina tscherta experientscha politica e quai er sin champ naziunal. Fin ussa saja il Grischun stà bain represchentà cun els dus en il cussegl dals chantuns, ha accentuà il president da la pcd grischuna. Cun la candidatura dubla da Pult veglia la ps er esser pli segira da defender il sez da Semadeni.

Pli ch’illoial

Silvio Zuccolini, il schef da medias da la pld grischuna e commember dal comité electoral, ha ditg che la candidatura da Pult per il cussegl dals chantuns saja ina vaira impertinenza. Ultra da quai saja ella pli ch’illoiala gist envers ils dus cussegliers dals chantuns existents Engler e Schmid. El hajan omadus fatg in bun num a Berna e sajan er adina vegnids numnads sco candidats pussaivels per il cussegl federal. Per el saja la candidatura dubla da Pult bunamain ina chaussa pli umoristica, ha menziunà Zuccolini.