Agid a Tschernobil enquera «geniturs»

(anr/abc) Ils 26 d’avrel 1986 ha ina explosiun el reactur 4 dall’ovra atomara a Tschernobil ell’Ucraina midau la veta per la populaziun che viveva 30 kilometers entuorn quel. Mellis e mellis carstgauns ein vegni contaminai cun radioactivitad, cunzun biars ella regiun el nord, ella tiara cunfinonta dalla Bielorussia. Da leu vegnan ils «affons da Tschernobil» che passentan dapi prest 25 onns in meins en Surselva. Ina gruppa da Glion e contuorn haveva fundau l’uniun Agid a Tschernobil Surselva cun quei scop, numnadamein organisar mintg’onn ina dimora da reconvalescenza per affons pertuccai dalla catastrofa. Ins ha saviu cumprovar ch’ils affons tuornan a casa rinforzai, cun vestas cotschnas dall’aria frestga e cun nova speronza egl avegnir. Quella dimora ei in agid direct ed effectiv ad affons che vivan en relaziuns socialas tut auter che bunas. L’uniun Agid a Tschernobil vul restar activa e possibilitar vinavon quella dimora da quater jamnas ella regiun dalla Surselva tochen Cuera e Tusaun. Per saver garantir quei agid humanitar direct drova ella denton urgentamein geniturs hospitonts che dattan alloschi ad in ni dus affons denter otg e 12 onns. Da miez matg tochen miez zercladur fuss il termin d’alloschi. Per quels affons ch’ein ellas famiglias grischunas organisescha l’uniun mintgamai quater gis ad jamna in vast program d’activitads. La mesjamna e las fins d’jamna ein els igl entir gi cullas famiglias. Ils geniturs hospitonts ston buca saver russ. Sco quei ch’ei semuossa mintg’onn tonscha in pign vocabulari culs plaids pli impurtonts. Scolastas che san tudestg accumpognan ed assistan ils affons, ellas circuleschan trasora ella regiun nua ch’ils affons ein en dimora. Els tuornan suenter quater jamnas cun biaras bialas impressiuns anavos ella Bielorussia. Pils affons eis ei ina dimora da reconvalescenza per tgierp ed olma. Tgi ch’ha plaz, peda ed ei motivaus da dar dimora ad in affon e ch’habitescha en Surselva, el Plaun e tochen Cuera e Tusaun duei s’annunziar tier la commembra dalla suprastonza dall’uniun Agid a Tschernobil Surselva, Brigitta Marranchelli, Summaprada, tel. 079 610 21 91. Era Ruth Keller, tel. 081 635 17 27 ni Evelyne Carcaterra, tel. 081 635 18 31, a Trin. Quellas persunas datttan era sclariments tier la dimora per affons. Fetg beinvegnidas ein era donaziuns da vestgadira, pertgei ils affons arrivan miez matg mo cun ina valischa pintga senza dapli vestgadira.

La pagina d’internet www.th-surselva.ch dat ulteriurs sclariments.