Jamna per l’unitad dils cristians cun 
il tema «Sestentar per giustia»

(cp) Onn per onn ha l’Jamna d’oraziun per l’unitad dils cristians liug dils 18 tochen ils 25 da schaner. Ei setracta dad in’occurrenza mundiala dapi 1909. Preparada e realisada vegn ella dalla cumissiun per cardientscha e baselgia dil Cussegl ecumenic dallas baselgias e dil Cussegl papal per l’unitad dils cristians. Els publicheschan ils documents da lavur (oraziuns) che stattan mintgamai sut in motto. Quei duei esser la basa per las stentas communablas. Cun quell’jamna vulan ins perschuader che l’oraziun communabla ei la premissa per tuttas stentas da reunir ils cristifideivels. Ils texts per quell’jamna d’oraziun ein vegni preparai per uonn d’ina gruppa da lavur ord l’Indonesia. Sco motto ei vegniu eligiu «Sestentar per giustia». La documentaziun vegn tarmessa dil Cussegl ecumenic mundial a sias baselgias-commembras e dil Vatican allas conferenzas episcopalas. L’jamna d’oraziun muossa claramein che las stentas ecumenas han – senza agid dil s. Spért – negin success. Sin l’oraziun sto il medem mument era l’ovra suandar. L’jamna d’oraziun munta buca semplamein da mo urar per l’unitad che Jesus Cristus ha regalau als fideivels, mobein che lezs dueien era tgirar e far veseivel quei ch’el ha affidau ad els.