Act commemorativ a Razén

(anr/abc) Dapi 200 onns ein ils habitonts dil Plaun liberai dalla dieschma. Ils 19 da schaner 1819 ha l’Austria surdau al cantun Grischun ufficialmein il Signeradi da Razén. Sonda ei stau igl act commemorativ el casti da Razén. Sonda vargada, exact sil gi, ha il comite aviert las festivitads giubilaras da 200 onns dapi la surdada dil Signeradi da Razén al cantun Grischun. Igl act simbolic ei staus el casti da Razén en preschientscha da rodund 30 hosps. Dapi 1958 s’auda il casti da Razén allas Ovras da Domat. L’acziunara principala dalla Ems Chemia, Magdalena Martullo, procura che hosps specials sesentan bein e ch’ins sa habitar en quei casti. Alla fiasta centenara dil Signeradi da Razén ha il president dall’uniun purtadra, Pierino Casutt, beneventau era il descendent dil davos administratur Georg von Toggenburg. Friedrich von Toggenburg, miedi-specialist a Buchs/Sogn Gagl, ha surdau simbolicamein la clav dil casti als representants dil cantun Grischun ed a Magdalena Martullo.

pagina 3