Da viadi cun il guardiaselvaschina

(rtr) Suenter ina tala navada sco avant in’emna n’èsi betg simpel per la selvaschina. Ils guardiaselvaschina admoneschan da laschar la selvaschina en ruaus. La selvaschina reducescha l’enviern sia temperatura dal corp, uschia ch’ella ha sulet anc tranter 17 e 20 grads temperatura, declera il guardiaselvaschina e manader dal district 2 da chatscha, Arnold Caminada. Uschia possia il tschierv surmuntar er in pli lung temp da navadas senza perder grond energia. Surtut entras sportists da naiv u er entras persunas che vulan fotografar vegnia la selvaschina disturbada. Da quels disturbis hajan prendì tiers ils ultims onns. Il turissem gioga in’impurtanta rolla en noss chantun. Ma il turissem e la selvaschina possian ir in sper l’auter or. Surtut sche tut las persunas resguardian las zonas da ruaus. En Surselva hai il mument radund 50 talas zonas da ruaus, declera Caminada. Ina da las lavurs principalas il mument saja da far attenta la populaziun da laschar en ruaus la selvaschina cunzunt en questas zonas. Tar ina situaziun cun ina tala navada entaifer curt temp saja quai er pussaivel d’instradar zonas da ruaus temporaras, accentuescha el. Cun pavlar la selvaschina vegnia quella concentrada en in pitschen territori ed uschia sajan donns vi dal guaud programmads. Plinavant saja vegnì observà ed era cumprovà che cun pavlar la selvaschina profiteschian surtut ils animals dominants. Ils animals flaivels na vegnian betg uschè tgunsch vitiers ina starliera, accentuescha il guardia selvaschina Gion Bundi. Era la biologia da l’animal selvadi saja concepida uschia ch’il magun vegnia pli pitschens durant l’enviern e cun porscher fain u auter pavel na vegnia quest proceder biologic betg activà e la selvaschina pateschia, uschia Caminada. Durant l’entir onn vegnia fatg la planisaziun e dumbraziun da chatscha. Uschia vegnia mintg’animal observà ed era mintg’animal ch’ins chattia futsch registrà e protocollà. Uschia possia il dumber dals animals vegnir stimà fitg bain, di Caminada. Plinavant saja impurtant che la populaziun annunzia a l’Uffizi chantunal da chatscha animals chattads u er observaziuns ch’han da far cun disturbis da la selvaschina. Senza las annunzias da la populaziun saja quai quasi nunpussaivel da far la lavur, quai surtut pervi ch’il territori saja grond.