Remo Stoffel: 
Sanar cun fusiunar

L’interprendider grischun Remo Stoffel ha reorganisà l’onn passà puspè ses concern. Quai ha dà in zic dapli invista en ses construct d’interpresas ed i dat indizis che mussan che la situaziun finanziala n’è betg uschè buna. Quai mussan retschertgas da la «Handelszeitung». Fusiuns da sanaziun èn ina mesira per il cas ch’ina societad è surdebitada. Quai vul dir: Ella ha dapli chapital ester ch’activas. Atgnamain stuess ina firma infurmar en in tal cas in derschader. Unic sch’ils crediturs desistan ad interim da lur dabun envers la societad n’ha la firma betg da far ina tala annunzia. Suenter èsi d’empruvar da sanar la firma. Pussaivel è quai cun fusiunar la firma en difficultads cun ina societad che stat finanzialmain meglier.

Bleras ovras electricas pitschnas n’hajan betg savì accumplir las cifras da producziun d’energia l’onn passà – quai pervi da la setgira, rapporta SRF. Quai savess vegnir char per radund 200 ovras pitschnas e fitg pitschnas. Ellas survegnan numnadamain in’indemnisaziun federala per cuvrir ils custs da furniziun, la KEV. Questa KEV vegn dentant be pajada sche las ovras produceschan in tschert quantum d’energia. Sche quai n’è betg il cas – sco actualmain pervi da l’aura da la stad passada – avessan ellas da pajar enavos la KEV. Tenor il manader da gestiun da la societad da las ovras pitschnas, Martin Bölli, pudess quai signifitgar en il pli mal cas per radund in terz da las ovras pitschnas il concurs. Uss ha l’Uffizi federal per l’energia dentant confermà sin dumonda da radio SRF che la confederaziun veglia adattar sia ordinaziun per ovras pitschnas: Ellas duajan be anc stuair pajar enavos la KEV sch’ellas èn sezzas la culpa da betg avair producì avunda energia. L’ordinaziun per las ovras pitschnas è pir in onn veglia.