Er senza Trump segirezza totala

DA GION NUTEGN STGIER / ANR

Oz cumenza a Tavau l’ediziun 2019 dal Forum mundial d’economia. Da la partida èn 3000 persunas da l’economia, politica, perscrutaziun e cultura. Quellas derivan da 90 naziuns. Schebain che Trump, Macron e May renunzian a la participaziun dal Forum mundial d’economia da quest onn è la segirtad per polizia e militar tuttina il pensum principal. Colonel Walter Schlegel, il cumandant da la polizia chantunala e superiur per l’entira segirezza da l’occurrenza a Tavau, ha ditg ier che per la polizia saja la renunzia da quellas trais persunalitdas politicas strusch in levgiament. La segirtad dals participants, da la populaziun ed er il schurmetg persunal per persunas impurtantas, quella haja d’esser garantida er senza Trump, Macron e May. Ferm sustegn survegn la polizia grischuna da tuts ils corps da polizia dals ulteriurs 25 chantuns e lura er dal militar. Fin 5000 schuldads dastgan tenor il conclus dal cussegl federal esser en acziun per il Forum mundial d’economia. Sco quai che Aldo C. Schellenberg, il substitut dal schef da l’armada svizra e cumandant da corps, ha ditg saja l’armada cunzunt er engaschada cun la segirezza da l’entir spazi d’aria. Sur Tavau è vegnì introducì en in radius da 46 km ed en in’autezza da 6000 meters in spazi d’aria reducì e quai a partir dad ier fin sonda saira.

pagina 2