In teppi da 30 meters

(anr/abc) La Scola da skis Lumnezia ha inaugurau in implont niev. Vendergis vargau ha la cooperativa dalla Scola da skis Lumnezia inaugurau in implont da transport. Igl ei buc ina sutgera ed era buc ina pendiculara. Enteifer il territori da skis da Sursaissa Mundaun dat ei treis scolas da skis, ina a Sursaissa, l’autra a Cuolm Sura-Mundaun, la tiarza a Vella. Tuttas treis porschan ina scoletta da skis nua ch’ils pigns san emprender da star sils skis e da far emprems carauns. Tuttas treis scolas han giu las davosas jamnas massa da far, aschia era quella a Vella. Sur las fiastas e suenter quellas han ils scolasts da skis giu d’instruir denter 140 e 150 affons pigns ella scoletta da skis. Dacuort ha lezza inaugurau in niev implont da transport. Il menader dalla scola da skis, Martin Capeder, ha presentau l’investiziun che la cooperativa dalla Scola da skis e da snowboard Lumnezia ha fatg. Igl implont senumna «teppi magic». Ei setracta d’ina tschenta electrica installada sigl areal dalla scoletta da skis. La tschenta rullonta ei 30 meters liunga, ell’ei installada sin ina surfatscha cun leva pendenza ed ha ina suletta funcziun: Transportar ensi ils pigns heroxs, quei ch’ei cumbinau cun in emprem test da curascha. In’invenziun d’avon 20 onns ord l’Austria ha gidau da sligiar il problem. La scola da skis a Vella ei stada ina dallas empremas en Svizra ch’ha remplazzau il runal da pony dalla scoletta da skis cun ina tschenta. Grazia alla surfatscha gruvia ed anti-lischnonta dil teppi ughegian els pli tgunsch da duvrar igl «ascensur». Ils pigns stattan sil teppi e selaian trer siadora. Quei funcziuna sco striunau, perquei ha igl implont survegniu il num «teppi magic».

Per entscheiver cul sport d’unviern ei in tal cundrez fetg ideals. Quei ha la Scola da skis da Vella encurschiu avon onns cu ella ha acquistau sco ina dallas empremas scolas da skis en Svizra igl implont innovativ. Uss eis ei stau uras da remplazzar il teppi magic. Per la cooperativa dalla Scola da skis Lumnezia eis ei stau ina pulita sfida finanziala, ella ha numnadamein stuiu investar 70 000 francs. La valur d’in teppi magic ei buca da sutvaletar. Sch’ils affons gaudan ina bun’entschatta sin skis ein era lur geniturs satisfatgs e tuornan puspei el liug. Emprender d’ir cun skis ei cumbinau cun bunas regurdientschas ed emoziuns. Sco quei che Capeder ha declarau a caschun dalla presentaziun dalla tschenta nova da transport ei la finanziaziun stada pusseivla grazia a differents sponsurs. Las grondas summas han Lumnezia Turissem e las Pendicularas Sursaissa Mundaun contribuiu. Quellas duas organisaziuns profiteschan a liunga vesta da hosps e skiunzs cuntents. Leu nua ch’ils affons han empriu dad ir cun skis vulan els per ordinari restar. Impurtont seigi ch’els hagien tschaffen da lur progress e sappien sesviluppar, ha Capeder manegiau. Per quei intent lavura la scoletta da skis a Vella cun in agen concept: Ils pigns che san ir cul teppi magic survegnan in’emprema «medaglia». Ina secunda gudognan els sch’els domineschan il caraun, lu dat ei ina tiarza per ulteriuras prestaziuns tecnicas. Suenter ch’els han gudignau tuttas tschun plachettas s’audan els tiels avanzai ed astgan far il proxim scalem, numnadamein ir cul runal da pony sper la sutgera Vella-Triel.