Ina regiunalisaziun è indispensabla

(anr/ac) Entaifer ils proxims tschintg enfin otg onns cuntanscha la mesadad dad administraturs ed administraturas dals 23 circuls d’uffizis dal register funsil en il chantun Grischun la vegliadetgna da pensiun. Sper la recrutaziun da nov persunal vesa la regenza grischuna ulteriura necessitad da regiunalisar il servetsch. En sia resposta sin la dumonda dal deputà Reto Löpfe (pcd Razén) scriva la regenza grischun dad enconuscher la problematica da persunal tar ils uffizis dal register funsil en il chantun Grischun. Quai malgrà che las vischnancas sajan responsablas respectiv ils circuls da register funsil. E la regenza grischuna è da l’opiniun che las vischnancas sajan pertschertas da la sfida da recrutar persunal qualifitgà per quels uffizis. Tenor in giudicament da l’inspecturat dal register funsil sajan tut ils uffizis londervi da chattar soluziuns internas per la successiun da l’administraziun. Novas vacanzas sa dettian uschia tar la substituziun. Las plazzas avertas sajan dad occupar entras scolaziun supplementara da las atgnas forzas da lavur e cun persunas adattadas derivantas dad autras professiuns. La tematica da la successiun e da las forzas da lavur vegnia cuntinuadamain discutada entaifer l’Uniun dals administraturs dals uffizis dal register funsil e l’uniun s’engaschia cun porscher scolaziun adattada als basegns da futurs administraturs dals uffizis. Plinavant vegnian las vischnancas infurmadas en consequenza da l’inspecziun entras l’inspecturat dal register funsil che succedia mintga dus onns.

Mancanza tar ils chantuns 
da la Svizra orientala

La regenza fa vinavant attent a la situaziun da mancanza dad administraturas ed administraturs dals uffizis dal register funsil enconuschenta en bunamain tut ils chantuns da la Svizra orientala. Per prevegnir a quella situaziun haja la regenza stgaffì in’ulteriura opziun da resguardar diploms da la giurisprudenza per administraturas ed administraturs. En passa la mesadad dals chantuns vegnian ils uffizis dal register funsil manads da giuristas e giurists. Plinavant ha la regenza fatg attent a la purschida da scolaziun da la vart dal chantun e da la branscha. L’auta quota da desditga tar ils davos trais examens per acquistar l’attest da qualificaziun per astgar manar in uffizi dal register funsil attribuescha la regenza per gronda part a mancanza da prativa da candidatas e candidats. Sulet bun la mesadad dals candidats ha dumagnà ils trais davos examens. En la resposta scriva la regenza dad esser persvadida ch’i reusseschia a las vischnancas dad occupar ils posts vacants tar ils uffizis dal register funsil. Optimar ils manaschis cun ina pli ferma regiunalisaziun da la purschida vegnia dentant ad esser indispensabel, scriva la regenza.