Pps giuvna di NA a l’iniziativa dals 
giuvens verds

La Partida populara giuvna dal Grischun refusa l’iniziativa da la construcziun dischordinada. Sco quai che la pps giuvna communtgescha saja l’iniziativa memia fixa e plain ristgs ed uschia la finala memia radicala. L’iniziativa dals giuvens verds vul tranter auter limitar las zonas da bajegiar en Svizra. Ils 10 da favrer votescha il suveran svizzer davart l’iniziativa da la construcziun dischordinada.

L’onn passà è il foss tranter ritg e pover vegnì anc pli profund, quai ha calculà l’organisaziun Oxfam. Entant che la facultad dals ritgs è creschida per 12% ha la mesadad povra da la populaziun pers 11%. Tenor il studi da l’organisaziun d’agid urgent, Oxfam, è la facultad dals pli ritgs creschida l’onn passà mintga di per 2,5 milliardas dollars. L’organisaziun crititgescha en ses rapport che las purschidas publicas da furmaziun, sanadad e segirtad sociala sajan sutfinanziadas sin l’entir mund, e quai malgrà che quellas purschidas attribueschan da reducir la paupradad e l’inegualitad. En il fratemp ch’ils superritgs augmentian lur facultads cun ina sveltezza da glisch giaja economicamain aval cun la mesadad da la populaziun mundiala ch’è povra, scriva Oxfam. L’inegualitad extrema na saja nagina lescha da la natira, mabain ina consequenza d’ina politica sbagliada. Surtut pertutgadas da l’inegualitad sociala sajan dunnas e mattas. Umens possedian en media 50% dapli facultad che dunnas. Quellas stoppian en pli vegnir ora cun pajas che sajan 23% pli bassas che quellas dals umens. Per onn prestian dunnas lavurs da tgira en l’autezza da 10 billiuns dollars americans. Quai correspunda a circa 38 giadas tant sco la svieuta annuala dal concern d’autos VW.