Bainbod vain fabrichada la nouva partiziun

(anr/fa) Al principi da favrer sun a fin tuot las stanzas ordinaras illa Chasa Puntota a Scuol. Lura cumainzan las lavuors per realisar la prüma partiziun da demenza illa regiun. La Chasa Puntota a Scuol es gnüda fabrichada i’ls ons 1950 e l’ingrondimaint in fuorma da mezza glüna dal 1991. Avant set ons han ils respunsabels laschà examinar ils edifizis da la dmura d’attempats d’Engiadina Bassa e vis chi d’eira da renovar quels. Quai vain fat in trais etappas per totalmaing 12,7 milliuns francs. Da l’on 2015 es gnüda realisada la prüm’etappa, la sanaziun energetica da l’edifizi il plü vegl. In lündeschdi saira ha salvà il Consorzi Chasa Puntota (CCPO) la radunanza da preventiv 2019. Da la suprastanza dal CCPO fan part la presidenta Ursina Mengiardi, il vicepresident e meidi Andri Kasper, il chaschier Curdin Müller, l’actuar Gian Peder Mischol e’ls assessuors Hermann Thom ed Aita Zanetti.

In venderdi finischa il seguond nivel

Il rapreschantant dal patrun d’fabrica Robert Hüberli ha orientà a la trentina da preschaints, da quels 19 consorziants, davart las lavuors da fabrica chi sun gnüdas realisadas. Avant la radunanza vaivan el e’l directur da la dmura, Roland Weber, manà als interessats tras la dmura e preschantà ils resultats da quistas lavuors. «Ils nivels quatter e trais sun terminats e las stanzas occupadas, e cul nivel duos finina in venderdi», ha dit Hüberli, «lura cumanzaina cul nivel ün, la partiziun da demenza, e cuntinuain parallelmaing cul tract d’immez chi rimplazza l’anteriura passarella.» In quist tract d’immez cha Weber ha nomnà «il cour da la dmura» daja per minch’etascha, nivel, üna stüvetta, ma eir büros e localitats pellas visitas dal meidi. «Dürant la terz’etappa vegnan lura sanadas las pignas da la dmura, dad üna vart l’implant cun ziplas e da tschella il s-chodamaint d’öla, pel principi da l’on 2021 esa previs da tillas pudair tour in funcziun», ha declerà Hüberli, «las lavuors pels contuorns da la dmura saran a fin fingià dürant il mais avuost.»

Daplü persunal pella chüra

Il schef da finanzas Curdin Müller ha preschantà il preventiv e las investiziuns 2019 dal CCPO. «Il preventiv prevezza 5,3 milliuns francs entradas e 6,6 milliuns francs sortidas, dimena calculaina cun ün deficit dad 1,3 milliuns francs», ha dit il chaschier. Las sortidas consistan, sco ch’el ha declerà, dals cuosts materials, las amortisaziuns e dals cuosts pel persunal plü gronds. «Per accumplir la lezcha da chürar ils abitants da la dmura dürant il temp da fabrica e plü tard eir quels da la nouva partiziun da demenza douvra la Chasa Puntota daplü persunal.» Per l’on 2020 sarà il deficit a seis avis fingià plü bass causa cha la gestiun illa dmura renovada, ingrondida ed optimada cumanzarà fingià a funcziunar darcheu. «E lura s’haja investi illa Chasa Puntota pels prossems decennis», ha dit Müller, «da quistas sanaziuns ed investiziuns capitan in media be mincha trent’ons.» Il quint d’investiziuns 2019 prevezza cuosts da 362 000 francs per pudair far tuot ils adattamaints necessaris, p. ex. optimar ils balcuns, installar s-chaffas culs medicamaints dals abitants, s’acquistar nouvas sopchas cun rouda e rollaturs ed oter plü. Pellas lavuors da fabrica ha fat il CCPO la dumonda per ün credit supplementar da 500 000 francs. «Causa la donaziun Mengiardi e la contribuziun dal Padrinadi per cumüns da muntogna dovraina be 200 000 francs implü chapital ester», ha dit il chaschier. Ils consorziants han approvà preventiv, quint d’investiziun e credit supplementar unanimamaing.