La zona da mistregn ei scarta

dad augustin beeli / anr

A Laax ei il terren scarts per mistregn ed industria. Fatschentas che drovan dapli plaz han pintgas pusseivladads d’optimar il menaschi. La carossaria Coray da Laax ha cletg. Avon varga 30 onns ha il stagner d’autos Gaudenz Coray baghegiau alla Via Val a Laax siu luvratori. Sper las lavurs usitadas d’in carossier porscha el ulteriurs survetschs, per exempel construescha el sez punts e mida entuorn vehichels. Ils davos onns eis ei vegniu pli e pli stretg cul plaz. Las parcellas situadas en quella via s’audan tier ina zona mischedada per mistregn e habitar. Tuttas 11 parcellas en quei territori stretg cunfineschan cul stradun dall’Alpsu e culla Val Mulin. Igl access ei pusseivels sur ina via locala che va parallel cul stradun cantunal.

Parcellas fetg tschercadas

Sia stagnaria d’autos ha Coray baghegiau sin in sulom da rodund 470 m2. Pil mistergner ei il plaz vegnius pli e pli scarts. Daferton ei il fegl Severin Coray turnaus si dalla Bassa, el meina ussa la carossaria, lavur ha el detgavunda. En vesta al futur ha la famiglia Coray stuiu encurir sligiaziuns co ins savess engrondir il luvratori. En quei liug lubeschan las leschas da planisaziun e da baghegiar denton neginas excepziuns.

Ni encunter il stradun ed era buc encunter la Via Val fuss ei stau pusseivel da slargar il baghetg. Gia dagitg ha Gaudenz Coray stuiu encurir ina pusseivladad da dislocar il menaschi. Avon circa dus onns eis el entraus en contact cun Giacun Stuppan. Igl impressari da bus, sespecialisaus sil transport da persunas cul bus shuttle, haveva baghegiau avon varga 30 onns ella zona da mistregn Marcau/Lieptgas ina halla dubla pils bus locals. Quella ha dau suosta als 12 bus che curseschan denter Bargis, Flem, Laax e Falera. Tochen igl onn vargau ha l’organisaziun turistica FLFM confidau agl impressari da Flem quei survetsch.

Il davos contract ei scadius ed ius a fin cun sia pensiun. En vesta a siu temps da pensiun haveva Stuppan tratg en consideraziun la vendita digl object. Coray ha contactau el il dretg mument. Ils dus umens ein spert secunvegni ed han realisau la midada da maun. Nua che la resgia da Laax sesanflava els onns tschunconta tochen otgonta ei oz ina dinamica zona da mistregn ed industria. Diversas fatschentas han baghegiau hallas per producir e magasinar, luvratoris, duas garaschas, in tancadi, ina fatschenta speciala da climatisaziun ha era anflau siu domicil cheu. E cheu vegn era Gaudenz Coray a dislocar la stagnaria d’autos.

Strusch ch’igl ei vegniu enconuschent ch’ei detti plaz alla Via Val per in mistergner ein tschun interessents s’annunziai tier Gaudenz e Severin Coray. Il plaz per menaschis da mistregn ei fetg scarts a Laax. Mintga quadrat ellas zonas da mistregn e mischedadas ei surbaghegiaus. Ferton ch’ei dat zonas per indigens a Laax ei il plaz per fatschentas cun luvratoris ni survetschs limitaus.

Contract va tochen 2021

Dapi il november vargau ei Stuppan pensiunaus. Ina dallas duas hallas ha el vendiu al carossier, l’autra ha el affittau vinavon alla distributura da fretgs e legums Selva SA. Malgrad ch’el ei pensiunaus ha Stuppan manteniu sia interpresa. La carossaria Coray ei actualmein vidlunder da baghegiar entuorn sia nova halla. Sco Severin Coray ha confirmau all’anr vegn la fatschenta a bardigliar igl 1. da mars 2019 ella zona da mistregn. Els ein satisfatgs, tonpli che la rundella Marcau levgiescha considerablamein igl access en e la sortida da quella zona. Ils bus shuttle che circuleschan permanentamein han piars lur domicil, silmeins parzialmein. Els ein d’impurtonza decisiva per la destinaziun. Il contract renovau culla Flem Laax Falera Management SA cuoza aunc dus onns. Tochen lu sto il provisori culs deposits esser sligiaus. Per Flem, Laax e Falera ei la vendita dalla halla ella zona d’industria e mistregn Lieptgas a Laax naturalmein ina sperdita. Igl ei in magasin ideal e central. Per quater dils 12 bus han Gaudenz e Severin Coray teniu liber il plaz en lur halla. Otg ein actualmein en provisoris, da quei sis en ina halla a Schluein Isla dalla firma Montalta e dus ella halla digl auto da posta a Laax. Ils proxims dus onns ston Flem, Laax e Falera sligiar il problem culs provisoris. Plaz avunda havess ei en scadin cass ella zona d’industria a Schluein. Lezza pusseivladad vegnan las vischnauncas dependentas dil turissem forsa a trer en consideraziun.