L’ustria el vitg – in liug da sentupada

(anr/ff) L’ustiera Zita Bass-Tuor ha tschercau ina successura ni in successur per menar egl avegnir l’ustria Cruna a Sumvitg e saviu surdar quell’impurtonta incarica alla fin digl onn vargau ad Yvonne Monn. La nov’ustiera ei bein preparada persuenter cul certificat dalla patenta d’ustiera e cun siu engaschament da sur in onn experientscha da survir e segidar cun Zita e Norbert Bass el menaschi dil restaurant.

In liug cun tradiziun

L’ustria Cruna a Sumvitg ha festivau igl onn 2001 siu 100avel onn d’existenza. Aviert il local all’entschatta dil vegnavel tschentaner haveva Giuanin Monn e naven digl onn 1915 han Placi Sigisbert Monn e sia dunna Rosalia surpriu il menaschi e menau quel tochen anno 1963. Ella marcanta casa sper la via principala enamiez il vitg ei vegniu aviert igl onn 1937 la stizun dall’assoziaziun Volg. Giuli e Margritha Tuor han administrau quell’instituziun e garantiu als avdonts dil vitg e contuorn il bien survetsch da stizun e dasperas en casa ha Rosalia fatg ustiera tochen igl onn 1963.

Da quei onn naven ha Giuli Tuor surpriu l’ustria cun sia dunna Margritha e sia famiglia. Suenter 19 onns ei il menaschi ius naven dil bab vi sin la feglia Zita e siu um Norbert igl onn 1982. Cun la surdada actuala dalla Cruna ad Yvonne Monn ei per vitg e vischnaunca in fatg zun giavischau ius en vigur. Sco suletta ustria el vitg ha il local ina funcziun sociala zun impurtonta sco liug da sentupada.

Il num «Cruna» ei a Sumvitg buca fetg currents. Gia pli baul mavan ils avdonts dil vitg «tier la tatta Rosalia» a far in sitg, pli tard s’entupavan els ell’ustria «tiel Giuli» ed ils davos 36 onns mav’ins «tier la Zita» per dar in scart ni dar ina paterlada entuorn meisa rodunda. Quei fatg demuossa la relaziun persunala che vischinas e vischins dalla vischnaunca havevan culs ustiers.

Tut tgi che sa ussa ch’Yvonne Monn ei la successura dalla Zita e dil Norbert astga pia egl avegnir duvrar l’expressiun dad ir ell’ustria «tier l’Yvonne». Aschia savess quella relaziun persunala vegnir tgirada vinavon e restar sco cordial usit local als da Sumvitg. La nov’ustiera vegn a tgirar vinavon cun tutt’attenziun ils hosps e porscher ils survetschs ad els sco tochen dacheu. Occasiuns specialas vegnan organisadas, l’avertura dil local resta sco el vargau ed aschia ei la cuntinuaziun per il liug da sentupada per giuven e vegl garantida.