Nua deponer ils bus locals?
(anr/abc) A Laax ei il plaz scarts per mistregn ed industria. Fatschentas che drovan dapli plaz han pintgas pusseivladads d’optimar il menaschi. Las parcellas ella zona Lieptgas ein occupadas. Avon dus onns ha Gaudenz Coray viu ina schanza per sia stagnaria d’autos. En vesta a siu temps da pensiun haveva igl impressari da bus Giacun Stuppan tratg en consideraziun la vendita dallas hallas da deposit. Coray ha contactau el il dretg mument. Ils dus umens da fatschenta ein spert secunvegni ed han realisau la midada da maun. Gaudenz e siu fegl Severin Coray han giu cletg. La stagnaria Coray ei actualmein vidlunder da baghegiar entuorn la halla. Stuppan, igl impressari da bus, lavura vinavon cun in contract che scada en dus onns. Tochen lu sto il provisori culs deposits dils bus esser sligiaus. Per Flem, Laax e Falera ei la vendita dalla halla pils bus locals ella zona d’industria e mistregn Lieptgas a Laax naturalmein ina sperdita. Ils bus locals gratuits ein ina purschida indispensabla. Per quater dils 12 bus han Gaudenz e Severin Coray teniu liber il plaz ella halla.
pagina 7
Gust da leger dapli?