Pajar taglia per ina parcella che vala bler pli pauc?

Da Claudia Cadruvi / ANR

Sin parcellas che sa chattan en la zona da planisaziun dad Ilanz/Glion na dastgan ins per il mument betg bajegiar. Ellas valan pia mo ina pitschna part da quai che figurescha sin il cedel da la stimaziun uffiziala. Sto il proprietari tuttina pajar taglia da facultad e d’immobiglias? Proximamain èsi puspè dad emplenir ora la decleraziun da taglia ed ils proprietaris cun suloms en la zona da planisaziun stattan avant in problem. Co duain els declerar lur parcella? Tenor la stimaziun uffiziala? U tenor quai che la parcella vala propi – numnadamain mo ina pitschna part dal pretsch da vendita ch’ins retschavess per in sulom ch’ins dastga surbajegiar? La probabilitad ch’il sulom croda definitivamain ord zona da bajegiar è pulit auta. Èsi lura giustifitgà ch’ins sto insumma anc pajar taglias persuenter?

Insatgi ha gia protestà

Ina protesta pertutgant taglia sin immobiglias per in sulom en la zona da planisaziun è para gia pendenta. Sch’ina persuna giuridica u natirala ha protestà n’è betg stà dad eruir.

L’Uffizi da taglia dad Ilanz/Glion è pertschert da la problematica. Ins saja da preschent londervi da sclerir quant aut ch’ina tala parcella duai vegnir stimada. Ina soluziun co proceder n’è anc betg sin maisa.

L’Uffizi da taglia communal renviescha al cumissari da taglia Hanspeter Mirer ch’è responsabel per bleras vischnancas en Surselva. «Ins enconuscha il problem», di Mirer e renviescha a l’Uffizi da taglia chantunal nua che la partiziun da dretg tschertga ina soluziun.

La chaussa n’è betg mo in problem per Ilanz/Glion, mabain daventa proximamain virulenta en l’entir Grischun, u meglier ditg en tut quellas vischnancas che ston redimensiunar las zonas da bajegiar. I na sa tracta plinavant era betg d’in problem che dura mo in onn. Anzi, las zonas da planisaziun restan tenor lescha dus onns en vigur e pon suenter anc vegnir prolungidas per ulteriurs dus onns.

Durant quel temp pajan ils proprietaris – sche lur parcellas vegnan imponidas tenor stimaziun uffiziala – memia blera taglia sin immobiglias e taglia sin facultad.

Correctura entras il 
cumissari da taglia

Proximamain decida l’Uffizi da taglia chantunal co proceder, di il giurist da l’uffizi da taglia chantunal Toni Hess sin dumonda da l’anr. L’entschatta favrer vul il chantun orientar a chaschun da la conferenza annuala ils cumissaris da taglia sch’i dat ina correctura e co che quella vesa or.

Sin la dumonda co ch’il proprietari pertutgà stoppia declerar ses sulom di Hess ch’ins tendeschia ad ina soluziun ex officio per vischnancas cun zonas da planisaziun tenor il model Ilanz/Glion. Quai vul dir: Iil cumissari da taglia è obligà da taxar ils suloms en la zona da planisaziun tenor la correctura ch’il chantun inditgescha. Hess favurisescha la soluziun ex officio perquai ch’ella tracta tuttina tut il proprietaris cun suloms en la zona da planisaziun sco quellas dad Ilanz/Glion. Da cuntanscher ed infurmar mintga soli proprietari pertutgà saja strusch pussaivel.

«Dira nusch»

Ina soluziun ex officio saja adattada e fitg favuraivla per il burgais e pajataglia, di René Matteotti, professer da dretg fiscal a l’Universitad da Turitg. La gronda dumonda saja simplamain quant auta che la correctura haja dad esser. La malsegirezza cun in tal sulom en la zona da planisaziun stoppia en mintga cas vegnir resguardada. La valitaziun d’ina tala parcella saja ina «dira nusch». Per l’imposiziun saja en sasez relevanta la valur al martgà. Ins stoppia pia sa dumandar tge pretsch ch’ins survegniss per in tal sulom sch’ins vendiss ussa. Plinavant fa Matteotti attent che las stimaziuns uffizialas sa chattian per il solit sut la valur dal martgà.

Ina eventuala correctura dependia pia era dal fatg quant ferm che la valitaziun uffiziala divergeschia dal pretsch dal martgà.