Taglia sin sulom a Glion

(anr/vi) Mintga proprietari sto declerar la valita da ses sulom en la decleranza da taglia. Ma tge far sch’in sulom è tuttenina en ina zona da planisaziun? Quai sa dumonda probabel inqual proprietari ad Ilanz/Glion. Sin in sulom en la zona da planisaziun na dastgan ins per il mument gea betg bajegiar e sch’ins al less vender ussa survegniss ins strusch in pretsch andant. L’Uffizi da taglia dad Ilanz/Glion è pertschert da la problematica e tar l’Uffizi da taglia chantunal tschertgan ins gia dapi in’urella ina soluziun. Decisiuns definitivas n’hajan ins anc betg prendì, di l’expert da taglia tar il chantun Toni Hess. Proximamain crodian dentant las decisiuns e lezzas communitgeschian ins l’entschatta favrer als cumissaris da taglia. Per vischnancas cun zonas da planisaziun tenor il model dad Ilanz/Glion favurisescha Hess ina soluziun ex officio. Quai vul dir: Il cumissari da taglia è obligà da taxar ils suloms tenor la correctura ch’il chantun decida.

pagina 5