Cube Savognin – 
quo vadis?

Il futur dal hotel Cube è intschert. I dat interessents, ma quels na vegnan sezs betg activs e n’èn er betg vegnids contactads. L’uniun d’albierts da giuventetgna fiss in candidat pussaivel per manar en futur il hotel Cube a Savognin. Il directur ad interim René Dobler ha confermà sin dumonda dad RTR: «In’offerta concreta examinain nus da tut temp gugent.» Il medem mument ha Dobler dentant er menziunà ch’els na sajan betg anc vegnidsì contactads dal possessur da l’hotel Cube. Il possessur Rudolf Tucek na respunda betg sin dumondas che pertutgan il futur dal pli grond hotel da Surses. Empruvà dad intermediar gia l’atun 2018 ha Daniel Fischer, il president dal cussegl d’administraziun da l’organisaziun turistica. Il cussegl ha dentant decidì da betg pli investir il mument energias en ina chaussa ch’el na possia betg influenzar: «La balla è tar Rudolf Tucek.»

Burgais dubels en il cussegl naziunal ed il cussegl dals chantuns duain stuair dir danunder ch’els èn burgais. Sco ils servetschs dal parlament han annunzià ha er la cumissiun da las instituziuns politicas dal cussegl dals chantuns approvà questa moziun cun sis cunter duas vuschs tar ina abstinenza. Per ils votants saja pli transparent sch’els enconuschian la segunda naziunalitad da politichers che sajan burgais dubels. Uss po il parlament decider davart la moziun. Cun in’autra iniziativa aveva Marco Chiesa da la pps/TI vulì scumandar la burgaisa dubla da cussegliers federals. Quest desiderat ha dentant fatg naufragi gia sin nivel da cumissiun. Avant l’elecziun dad Ignazio Cassis avevan ils politichers gia discutà en chaussa. Lez aveva anc avant sia elecziun dà giu ses pass talian.

La cumissiun d’instituziuns politicas dal cussegl dals chantuns propona d’elavurar ina cuntraproposta a l’iniziativa da transparenza. L’iniziativa ch’è vegnida inoltrada l’atun avant in onn tranter auter dals verds, da la Partida socialdemocratica e da la pbd pretenda che las partidas stoppian publitgar lur finanzas e render transparentas lur investiziuns en campagnas electoralas e da votaziuns. Ch’i dovria qua reglas cleras crai era la maioritad da la cumissiun. Ell’è dentant da l’opiniun ch’i na dovria betg ina midada da la Constituziun, mabain ch’i tanschia da midar la lescha federala. Sch’era la cumissiun dal cussegl naziunal è da questa opiniun duai vegnir elavurada ina proposta concreta anc questa primavaira. Er integrar en quella vul la cumissiun da la chombra pitschna in scumond per las partidas d’acceptar donaziuns da persunas ed organisaziuns da l’exteriur.

La Svizra è da nov represchentada da vart uffiziala al Forum mundial d’economia (FEM) a Tavau. Il mardi han quatter cussegliers federals inaugurà il House of Switzerland – in lieu da sentupada. Tavau saja il lieu nua ch’il mund vegnia ensemen, ha il cusseglier federal Ignazio Cassis ditg tar l’avertura da la nova chasa. Cun il House of Switzerland haja la delegaziun svizra uss er in lieu nua che manaders da fatschenta svizzers possian s’inscuntrar cun auters schefs da concern – e quai davos ischs serrads. Sper Cassis èn er stads preschents a l’avertura il president da la confederaziun Ueli Maurer, il minister d’economia Guy Parmelin ed il minister da l’intern Alain Berset. Il House of Switzerland vegn manà dal Departament federal d’affars exteriurs – quai cun in budget da 100 000 francs. Planisadas èn quatter occurrenzas uffizialas.